ಜುಗುಳ ಗ್ರಾಮದಲ್ಲಿ ಜಂಗಲವಾಲೆ ಬಾಬಾ ಮಂದಿರ ಸ್ಥಾಪನೆ

ಧರ್ಮ ಪ್ರಸಾರಕ ಚಿನ್ಮಯಸಾಗರ್ ಮಹಾರಾಜರಿಗೆ ವಿಶೇಷ ಗೌರವ

ವಿವಿಧ ರಾಜ್ಯಗಳ ಗಣ್ಯರಿಂದ ಕಾರ್ಯಕ್ರಮದಲ್ಲಿ ಭಾಗಿ

ಅಹಿಂಸಾ ತತ್ವದ ಹರಿಕಾರನಿಗೆ ಜನ್ಮಭೂಮಿಯ ನಮನ

ಕಾಗವಾಡ ತಾಲೂಕಿನ ಜುಗುಳ ಗ್ರಾಮದ ಸುಪುತ್ರರು ಹಾಗೂ ತಮ್ಮ ಸಂಪೂರ್ಣ ಜೀವನವನ್ನು ಅರಣ್ಯದಲ್ಲೇ ಕಳೆದಿದ್ದರಿಂದ ‘ಜಂಗಲವಾಲೆ ಬಾಬಾ’ ಎಂದೇ ಪ್ರಖ್ಯಾತರಾದ ಚಿನ್ಮಯಸಾಗರ್ ಮಹಾರಾಜರ ಹುಟ್ಟೂರಿನಲ್ಲಿ, ಶನಿವಾರದಂದು ಗುರು ಮಂದಿರ ಹಾಗೂ ಚರಣ ಮಂದಿರ ಸ್ಥಾಪನಾ ಕಾರ್ಯಕ್ರಮ ನೆರವೇರಲಿದೆ.

ಜಂಗಲವಾಲೆ ಬಾಬಾ ಅವರು ತಮ್ಮ ಇಡೀ ಜೀವನವನ್ನು ಛತ್ತೀಸ್‌ಗಢ ರಾಜ್ಯದ ಕಾಡುಗಳಲ್ಲಿ ಕಳೆದರು. ಕಾಡುಪ್ರಾಣಿಗಳೊಂದಿಗೆ ವಾಸಿಸುತ್ತಿದ್ದ ಅವರು, ಅಲ್ಲಿನ ಅನೇಕ ಅರಣ್ಯವಾಸಿಗಳ ಮನಪರಿವರ್ತನೆ ಮಾಡಿ, ಸಮಾಜದ ಬಗ್ಗೆ ಅರಿವು ಮೂಡಿಸಿ ಅವರನ್ನು ಸನ್ಮಾರ್ಗಿಗಳನ್ನಾಗಿ ಪರಿವರ್ತಿಸಿದ್ದಾರೆ. ಛತ್ತೀಸ್‌ಗಢ, ಭಾಟಾಪಾರ, ರಾಜಸ್ಥಾನ, ಮಧ್ಯಪ್ರದೇಶ, ಉತ್ತರ ಪ್ರದೇಶ, ಮಹಾರಾಷ್ಟ್ರ ಹಾಗೂ ಕರ್ನಾಟಕ ಸೇರಿದಂತೆ ವಿವಿಧ ರಾಜ್ಯಗಳಲ್ಲಿ ಬರಿಗಾಲಿನಿಂದ ಸಂಚರಿಸಿ ಜೈನ ಧರ್ಮದ ಅಹಿಂಸಾ ತತ್ವಗಳನ್ನು ಪ್ರಚುರಪಡಿಸಿದ್ದಾರೆ.

ಚಿನ್ಮಯಸಾಗರ್ ಚಾರಿಟೇಬಲ್ ಟ್ರಸ್ಟ್ (ಭಾಟಾಪಾರ, ಛತ್ತೀಸ್‌ಗಢ) ಹಾಗೂ ಸಕಲ ದಿಗಂಬರ ಜೈನ ಸಮಾಜದ ವತಿಯಿಂದ ಈ ಗುರು ಮಂದಿರ ಹಾಗೂ ಚರಣ ಪಾದುಕೆ ಪ್ರತಿಷ್ಠಾಪನಾ ಕಾರ್ಯಕ್ರಮವು ಶನಿವಾರ ಜರುಗಲಿದೆ. ಈ ಕಾರ್ಯಕ್ರಮವು ಪರಮ ಪೂಜ್ಯ 108 ಸಾರಥ್ಸವ ಸಾಗರ ಮುನಿ ಮಹಾರಾಜರು, ಪರಮ ಪೂಜ್ಯ 108 ಜಯಂತ ಸಾಗರ ಮುನಿ ಮಹಾರಾಜರು ಹಾಗೂ ಪರಮ ಪೂಜ್ಯ 108 ಸಿದ್ಧ ಸಾಗರ ಮುನಿ ಮಹಾರಾಜರ ದಿವ್ಯ ಸಾನ್ನಿಧ್ಯದಲ್ಲಿ ನೆರವೇರಲಿದೆ.

ಶುಕ್ರವಾರ ಹಮ್ಮಿಕೊಂಡಿದ್ದ ಪೂರ್ವಭಾವಿ ಕಾರ್ಯಕ್ರಮದಲ್ಲಿ ಚಿನ್ಮಯಸಾಗರ್ ಚಾರಿಟೇಬಲ್ ಟ್ರಸ್ಟ್‌ನ ಪ್ರಕಾಶ್ ಮೋದಿ, ಸುಮಲತಾ ಮೋದಿ, ಮುಂಬೈನ ಉದ್ಯಮಿ ಜಮುನಾಲಾಲ್ ಹೇಪಾವತ, ದಕ್ಷಿಣ ಭಾರತ ಜೈನ ಸಭೆಯ ಮಾಜಿ ಅಧ್ಯಕ್ಷ ಡಿ. ಎ. ಪಾಟೀಲ್, ಮಧ್ಯಪ್ರದೇಶ ರಾಜ್ಯದ ಇಂದೋರ್ ಜಿಲ್ಲೆಯ ಎಸಿಪಿ ವಿವೇಕ್ ಚೌಹಾಣ್, ಪ್ರತಿಷ್ಠಾಚಾರ್ಯ ತಶಾಸ್ತ್ರ ಜಿ (ಇಂದೋರ್), ತಲ್ಲಿನ ಬಡಜಾತ್ಯ (ಇಂದೋರ್), ಪ್ರೆಸ್ ಕೌನ್ಸಿಲ್ ಆಫ್ ಇಂಡಿಯಾದ ಪ್ರದೀಪ್ ಜೈನ್ (ರಾಯ್‌ಪುರ), ನರೇಂದ್ರ ಗುರುಕೃಪ (ರಾಯ್‌ಪುರ), ರಮೇಶ್ ಪಾಟೀಲ್, ಮನೋಹರ್ ಉಪಾಧ್ಯೆ, ಕುಮಾರ್ ಪಾಟೀಲ್ ಹಾಗೂ ಅಭಿಯಂತರ ಸಂಜಯ್ ನಾಂದನಿ ಸೇರಿದಂತೆ ಅನೇಕ ಗಣ್ಯರು ಪಾಲ್ಗೊಂಡು ನಾಳಿನ ಕಾರ್ಯಕ್ರಮವನ್ನು ಯಶಸ್ವಿಗೊಳಿಸಲು ಸನ್ನದ್ಧರಾಗಿದ್ದಾರೆ.