ಐತಿಹಾಸಿಕ ನಗರಿ ಬಾದಾಮಿಯಲ್ಲಿ ನಿನ್ನೆ ಸುರಿದ ಭಾರಿ ಮಳೆಗೆ ಪ್ರಕೃತಿ ಮಾತೆ ಮೈದಳೆದಿದ್ದಾಳೆ. ಬಾದಾಮಿಯ ಪ್ರಸಿದ್ಧ ಪ್ರವಾಸಿ ತಾಣವಾದ ಅಕ್ಕ-ತಂಗಿಯರ ಜಲಪಾತವು ಭೋರ್ಗರೆದು ಧುಮ್ಮಿಕ್ಕುತ್ತಿದ್ದು, ಹಾಲಿನ ನೊರೆಯಂತಹ ಈ ನಯನಮನೋಹರ ದೃಶ್ಯವನ್ನು ಕಣ್ತುಂಬಿಕೊಳ್ಳಲು ಪ್ರವಾಸಿಗರು ತಂಡೋಪತಂಡವಾಗಿ ಆಗಮಿಸುತ್ತಿದ್ದಾರೆ.
ಬಾಗಲಕೋಟೆ ಜಿಲ್ಲೆಯ ಐತಿಹಾಸಿಕ ಪ್ರವಾಸಿ ತಾಣವಾದ ಬಾದಾಮಿಯಲ್ಲಿ ನಿನ್ನೆ ಸುರಿದ ಭಾರಿ ಮಳೆಯ ಅಬ್ಬರಕ್ಕೆ ಪ್ರಸಿದ್ಧ ‘ಅಕ್ಕ-ತಂಗಿಯರ ಜಲಪಾತ’ವು ಭೋರ್ಗರೆದು ಧುಮ್ಮಿಕ್ಕುವ ಮೂಲಕ ಸಾರ್ವಜನಿಕರ ಮನಸೊರೆಗೊಳಿಸಿದೆ. ಇಲ್ಲಿನ ಸುಪ್ರಸಿದ್ಧ ಭೂತನಾಥ ದೇವಾಲಯದ ಹಿಂಭಾಗದ ಬೆಟ್ಟದ ಮೇಲಿಂದ ಹಾಲಿನ ನೊರೆಯಂತೆ ಧುಮ್ಮಿಕ್ಕುತ್ತಿರುವ ಈ ಜಲಪಾತದ ಭವ್ಯ ದೃಶ್ಯವು ಇಡೀ ಬಾದಾಮಿಯ ಪ್ರಕೃತಿ ಸೌಂದರ್ಯವನ್ನು ಇಮ್ಮಡಿಗೊಳಿಸಿದೆ. ವರ್ಷದ ಮೊದಲ ಮಳೆಗೆ ಜಲಪಾತವು ಮೈದುಂಬಿ ಹರಿಯುತ್ತಿರುವುದನ್ನು ಕಂಡು ಸ್ಥಳೀಯರು ಹಾಗೂ ಪ್ರವಾಸಿಗರು ಸಂಪೂರ್ಣ ಫಿದಾ ಆಗಿದ್ದು, ಪ್ರಕೃತಿಯ ಈ ಅಪರೂಪದ ವೈಭವವನ್ನು ಕಣ್ತುಂಬಿಕೊಂಡು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುತ್ತಾ ಸಂಭ್ರಮಿಸುತ್ತಿದ್ದಾರೆ.
