• ಖಾನಾಪುರ ಆಟೋ ಚಾಲಕನ ಅಪಾರ ಪ್ರಾಮಾಣಿಕತೆ
• ಮರೆತಿದ್ದ ಚಿನ್ನದ ಸರ ಸುರಕ್ಷಿತವಾಗಿ ವಾಪಸ್
• ಮಾದರಿಯಾದ ಚಾಲಕ ಸಹದೇವ್ ಮೋರೆ ಕಾರ್ಯ
• ಸಾರ್ವಜನಿಕ ವಲಯದಲ್ಲಿ ಚಾಲಕನಿಗೆ ಭರ್ಜರಿ ಪ್ರಶಂಸೆ

ಮನುಷ್ಯತ್ವ ಸತ್ತಿಲ್ಲ ಎಂಬುದಕ್ಕೆ ಖಾನಾಪುರದ ಆಟೋ ಚಾಲಕರೊಬ್ಬರು ಸಾಕ್ಷಿಯಾಗಿದ್ದಾರೆ. ಆಟೋದಲ್ಲಿ ಬಿಟ್ಟು ಹೋಗಿದ್ದ ಲಕ್ಷಾಂತರ ರೂಪಾಯಿ ಮೌಲ್ಯದ ಚಿನ್ನದ ಸರ ಹಾಗೂ ನಗದನ್ನು ವಾರಸುದಾರರಿಗೆ ತಲುಪಿಸುವ ಮೂಲಕ ಸಹದೇವ್ ಮೋರೆ ಅವರು ಸಮಾಜಕ್ಕೆ ಮಾದರಿಯಾಗಿದ್ದಾರೆ.
ಖಾನಾಪೂರ ನಗರದ ಶಿವಸ್ಮಾರಕ ಚೌಕ್ ಆಟೋ ನಿಲ್ದಾಣದ ಆಟೋ ಚಾಲಕ ಸಹದೇವ್ ಮೋರೆ ಅವರು ತೋರಿದ ಪ್ರಾಮಾಣಿಕತೆಗೆ ಎಲ್ಲೆಡೆ ಪ್ರಶಂಸೆ ವ್ಯಕ್ತವಾಗುತ್ತಿದೆ. ಮಹಿಳಾ ಪ್ರಯಾಣಿಕರು ಆಟೋದಲ್ಲಿ ಮರೆತಿದ್ದ ಪರ್ಸ್ ಅನ್ನು ಸುರಕ್ಷಿತವಾಗಿ ಇಟ್ಟು, ಅದರಲ್ಲಿದ್ದ -ಒಂದೂವರೆ ತೋಲೆ ಚಿನ್ನದ ಸರ ಹಾಗೂ ನಗದು ಹಣವನ್ನು ಅವರು ಪ್ರಾಮಾಣಿಕವಾಗಿ ಹಿಂತಿರುಗಿಸಿದರು.

ಮೂಲತಃ ಕರಂಬಳ ಗ್ರಾಮದವರಾಗಿದ್ದು, ಪ್ರಸ್ತುತ ಪುಣೆಯಲ್ಲಿ ವಾಸಿಸುತ್ತಿರುವ ರಾಜಶ್ರೀ ಮನೋಳ್ಕರ್ ಹಾಗೂ ಅವರ ಪತಿ ಸುಭಾಷ್ ಮನೋಳ್ಕರ್ ಅವರು ಬಂಧುಗಳ ವಿವಾಹ ಸಮಾರಂಭಕ್ಕಾಗಿ ಖಾನಾಪೂರಕ್ಕೆ ಬಂದಿದ್ದರು. ಸಂಜೆ ವೇಳೆ ಅವರು ಸಹದೇವ್ ಮೋರೆ ಅವರ ಆಟೋದಲ್ಲಿ ಕರಂಬಳ ಕಡೆಗೆ ತೆರಳಿದ್ದರು. ಈ ವೇಳೆ ಗಡಿಬಿಡಿಯಲ್ಲಿ ರಾಜಶ್ರೀ ಅವರು ತಮ್ಮ ಪರ್ಸ್ ಅನ್ನು ಆಟೋದಲ್ಲೇ ಮರೆತು ಹೋಗಿದ್ದರು.

ಶನಿವಾರ ಬೆಳಿಗ್ಗೆ ಆಟೋದಲ್ಲಿ ಪರ್ಸ್ ಪತ್ತೆಯಾದ ತಕ್ಷಣ ಸಹದೇವ್ ಮೋರೆ ಅವರು ಶಿವಸ್ಮಾರಕ ಆಟೋ ಸಂಘದ ಅಧ್ಯಕ್ಷ ದತ್ತ ವಂಜಾರೆ ಅವರೊಂದಿಗೆ ಸಂಪರ್ಕಿಸಿದರು. ವಂಜಾರೆ ಅವರು ತಕ್ಷಣವೇ ಪ್ರಯಾಣಿಕರನ್ನು ಪತ್ತೆಹಚ್ಚಿ ಪರ್ಸ್ ಸುರಕ್ಷಿತವಾಗಿರುವುದಾಗಿ ಮಾಹಿತಿ ನೀಡಿದರು.

ಮಧ್ಯಾಹ್ನ ಆಟೋ ನಿಲ್ದಾಣದಲ್ಲಿ ರಾಜಶ್ರೀ ಮತ್ತು ಸುಭಾಷ್ ಮನೋಳ್ಕರ್ ಅವರಿಗೆ ಪರ್ಸ್‌ನಲ್ಲಿದ್ದ ಒಂದೂವರೆ ತೋಲೆ ಚಿನ್ನದ ಸರ ಹಾಗೂ ಎಂಟು ನೂರು ರೂಪಾಯಿ ನಗದು ಹಣವನ್ನು ಹಸ್ತಾಂತರಿಸಲಾಯಿತು. ಈ ಸಂದರ್ಭದಲ್ಲಿ ಮಾರುತಿ ಜೋಶೀಲ್ಕರ್, ಶಂಕರ ಚೌಗುಲೆ, ವಿಶಾಲ್ ಪಾಟೀಲ್, ಪ್ರದೀಪ್ ಬೋಬಾಟೆ, ಪತ್ರಕರ್ತ ವಾಸುದೇವ್ ಚೌಗುಲೆ, ಗಜಾನನ ಬೆಳಗಾವ್ಕರ್ ಸೇರಿದಂತೆ ಇತರರು ಉಪಸ್ಥಿತರಿದ್ದರು.

ಸಹದೇವ್ ಮೋರೆ ಅವರ ಈ ಪ್ರಾಮಾಣಿಕ ಕಾರ್ಯದಿಂದ ಖಾನಾಪೂರದಲ್ಲಿ ಅವರ ಮೇಲೆ ಅಭಿನಂದನೆಯ ಸುರಿಮಳೆ ಆಗಿದ್ದು, ಅವರ ಪ್ರಾಮಾಣಿಕತೆ ಇತರರಿಗೆ ಮಾದರಿಯಾಗಿದೆ.