• ಖಾನಾಪುರ ಕಾಡಿನಲ್ಲಿ ಕಾಡುಪ್ರಾಣಿಗಳ ಸಂಚಾರ
• ಗುಂಜಿ-ತಿವೋಲಿ ರಸ್ತೆಯಲ್ಲಿ ಕಾಡುಕೋಣ ಪ್ರತ್ಯಕ್ಷ
• ಪ್ರವಾಸಿಗರ ಮೊಬೈಲ್ನಲ್ಲಿ ದೃಶ್ಯ ಸೆರೆ
• ಕಾಡಿನ ರಾಜನಂತೆ ದಾರಿಬಿಟ್ಟ ಪ್ರಾಣಿಗಳು
ಖಾನಾಪುರದ ದಟ್ಟ ಅರಣ್ಯದ ನಡುವೆ ಪ್ರಯಾಣಿಸುವಾಗ ಎದುರಾಗುವ ಆ ಸರ್ಪ್ರೈಸ್ ಇದೀಗ ಇನ್ ನ್ಯೂಸ್ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಗುಂಜಿ ಸಮೀಪದ ತಿವೋಲಿ ರಸ್ತೆಯಲ್ಲಿ ಕಾಡುಕೋಣ ಮತ್ತು ಕಾಡೆಮ್ಮೆಗಳ ಹಿಂಡು ಪ್ರತ್ಯಕ್ಷವಾಗಿದ್ದು, ವಾಹನ ಸವಾರರಲ್ಲಿ ಒಂದು ಕ್ಷಣ ನಡುಕದ ಜೊತೆ ಕುತೂಹಲ ಮೂಡಿಸಿದೆ.
ಘಟ್ಟದ ಸೌಂದರ್ಯವನ್ನು ಹೊದ್ದಿರುವ ಖಾನಾಪುರ ತಾಲೂಕು ನೂರಕ್ಕೆ ನೂರರಷ್ಟು ಅರಣ್ಯದಿಂದ ಆವೃತವಾದ ಪ್ರದೇಶ. ಇಲ್ಲಿ ಕಾಡು ಪ್ರಾಣಿಗಳ ದರ್ಶನ ಸಹಜವಾದರೂ, ಗುಂಜಿ ಮಾರ್ಗ ಮಧ್ಯದ ತಿವೋಲಿ ರಸ್ತೆಯ ಮೇಲೆ ಹಠಾತ್ತಾಗಿ ಕಾಡುಕೋಣಗಳ ತಂಡ ಕಾಣಿಸಿಕೊಂಡಿದ್ದು ಸಂಚಲನ ಮೂಡಿಸಿದೆ. ರಸ್ತೆಯ ಬದಿಯಲ್ಲಿ ನಿಂತು ಗಂಭೀರವಾಗಿ ಪಹರೆ ನೀಡುವಂತೆ ಕಂಡ ಈ ಕಾಡುಕೋಣಗಳನ್ನು ಕಂಡ ಪ್ರವಾಸಿಗರು ಆತಂಕಗೊಂಡರೂ, ಅಷ್ಟೇ ಉತ್ಸಾಹದಿಂದ ಈ ಅಪರೂಪದ ಕ್ಷಣಗಳನ್ನು ತಮ್ಮ ಮೊಬೈಲ್ ಫೋನ್ನಲ್ಲಿ ಸೆರೆಹಿಡಿದಿದ್ದಾರೆ.
ಕಾಡಿನ ಆಳದಿಂದ ನಾಡಿನ ರಸ್ತೆಯಂಚಿಗೆ ಬಂದ ಈ ಪ್ರಾಣಿಗಳು ಕೆಲಕಾಲ ಸಂಚಾರಕ್ಕೆ ಅಡ್ಡಿಪಡಿಸಿದರೂ, ಪರಿಸರ ಪ್ರೇಮಿಗಳಿಗೆ ಮಾತ್ರ ಹಬ್ಬದೂಟ ಉಣಬಡಿಸಿವೆ. ದಟ್ಟ ಹಸಿರಿನ ನಡುವೆ ಕಡುಗಪ್ಪಿನ ಬಲಿಷ್ಠ ಕಾಡುಕೋಣಗಳ ಆ ಗಾಂಭೀರ್ಯದ ನೋಟ ನಿಜಕ್ಕೂ ಅದ್ಭುತವಾಗಿತ್ತು. ನಮ್ಮ ‘ಇನ್ ನ್ಯೂಸ್’ ವೀಕ್ಷಕರು ಕಳುಹಿಸಿಕೊಟ್ಟಿರುವ ಈ ವಿಶೇಷ ವಿಡಿಯೋದಲ್ಲಿ ಕಾಡಿನ ವನ್ಯಸಂಪತ್ತಿನ ನೈಜ ಚಿತ್ರಣ ಅಡಗಿದ್ದು, ವನ್ಯಜೀವಿಗಳ ಸಂರಕ್ಷಣೆಯ ಮಹತ್ವವನ್ನು ಸಾರುತ್ತಿದೆ.
