ಬೆಳಗಾವಿ ಸಮೀಪದ ಜೆ.ಆರ್.ಡಿ. ಪ್ರೌಢ ಶಾಲೆಯ 2004-05ನೇ ಸಾಲಿನ ಹಳೇ ವಿದ್ಯಾರ್ಥಿಗಳು ಹಮ್ಮಿಕೊಂಡಿದ್ದ ‘ಗುರುವಂದನಾ’ ಕಾರ್ಯಕ್ರಮವು ಭಾವನಾತ್ಮಕ ಕ್ಷಣಗಳಿಗೆ ಸಾಕ್ಷಿಯಾಯಿತು. ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ನಿವೃತ್ತ ಹಾಗೂ ಹಿರಿಯ ಶಿಕ್ಷಕರು ವಿದ್ಯಾರ್ಥಿಗಳಿಗೆ ದೇಶದ ಸತ್ಪ್ರಜೆಗಳಾಗುವಂತೆ ಪ್ರೇರಣಾದಾಯಕ ಸಂದೇಶ ನೀಡಿದರು.

ಬೆಳಗಾವಿ ಸಮೀಪದ ಜೆ.ಆರ್.ಡಿ. ಪ್ರೌಢ ಶಾಲೆಯ 2004-05ನೇ ಸಾಲಿನ ಹಳೇ ವಿದ್ಯಾರ್ಥಿಗಳ ಒಕ್ಕೂಟದ ವತಿಯಿಂದ ಅತ್ಯಂತ ಯಶಸ್ವಿಯಾಗಿ ಗುರುವಂದನಾ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು. ಈ ಸಮಾರಂಭದಲ್ಲಿ ಹಳೇ ವಿದ್ಯಾರ್ಥಿಗಳಾದ ಚೇತನ್ ದೇಸಾಯಿ, ಆನಂದ ಹಿರೇಮಠ, ಚಂದನ ಬಡವಣ್ಣವರ, ಮಾಣಿಕ ಸೈಬಣ್ಣವರ, ಗಂದಿಗವಾಡ, ಬಾಹುಬಲಿ ನವಲೂರ ಸೇರಿದಂತೆ ಹಲವರು ಪಾಲ್ಗೊಂಡು ತಮ್ಮ ಶಾಲಾ ದಿನಗಳ ಮಧುರ ನೆನಪುಗಳನ್ನು ಮೆಲುಕು ಹಾಕಿದರು.

ಇದೇ ವೇಳೆ ವೇದಿಕೆಯಲ್ಲಿದ್ದ ಪೂಜ್ಯ ಶಿಕ್ಷಕರಾದ ಬಿ.ಎಚ್. ಬಿಳಗೋಜಿ, ಎ.ಸಿ. ಜಕ್ಕಣ್ಣವರ, ಸುನೀಲ್ ಜರಾಳೆ, ಎಂ.ಬಿ. ಪಾಟೀಲ್, ಎ.ವೈ. ಗುಮಾಜ್, ಬಿ.ಎಂ. ಲಕ್ಕನಗೌಡರ, ಕೆ.ಡಿ. ಪಾಟೀಲ್, ನಳಿನಿ ಅಗರೆ, ದೇವಕಿ ಕಾಕತಿ ಹಾಗೂ ಎ.ಎ. ಸನದಿ ಮುಂತಾದವರು ಮಾತನಾಡಿ, “ಪೋಷಕರು ತಮ್ಮ ಮಕ್ಕಳಿಗಾಗಿ ಆಸ್ತಿ ಮಾಡುವುದನ್ನು ಬಿಟ್ಟು, ಮಕ್ಕಳನ್ನೇ ದೇಶದ ದೊಡ್ಡ ಆಸ್ತಿಯನ್ನಾಗಿ ಮಾಡಬೇಕು; ಅವರಿಗೆ ಶಿಕ್ಷಣದ ಜೊತೆಗೆ ಸಂಸ್ಕಾರ ಹಾಗೂ ಸಂಸ್ಕೃತಿಯನ್ನು ಕಲಿಸಿ ಸಮಾಜಮುಖಿ ಪ್ರಜೆಗಳನ್ನಾಗಿ ರೂಪಿಸಬೇಕು” ಎಂದು ಮನಮಿಡಿಯುವ ಕರೆ ನೀಡಿದರು. ಕಾರ್ಯಕ್ರಮದ ಯಶಸ್ಸಿಗಾಗಿ ಶಾಲೆಯ ಹಳೇ ವಿದ್ಯಾರ್ಥಿ ಬಳಗ ಮತ್ತು ಸಿಬ್ಬಂದಿ ವರ್ಗದವರು ಶ್ರಮಿಸಿದರು.