ಬೆಳಗಾವಿಯ ಕೋಟೆ-ಕೊತ್ತಲಗಳು ಹಾಗೂ ಐತಿಹಾಸಿಕ ಪರಂಪರೆಯನ್ನು ಸಂರಕ್ಷಿಸುವ ಉದ್ದೇಶದಿಂದ ‘ಗಡಕಿಲ್ತ್ಲೆ ಸಂವರ್ಧನ ಪ್ರತಿಷ್ಠಾನ’ ಬೆಳಗಾವಿ ವಿಭಾಗದ ವತಿಯಿಂದ ದುರ್ಗ ಮಹಿಪಾಳಗಡದಲ್ಲಿ ‘ಮೊದಲು ಕೋಟೆಗೆ ತೋರಣ… ಆಮೇಲೆ ಮನೆಗೆ…!’ ಎಂಬ ವಿಶಿಷ್ಟ ಪರಿಕಲ್ಪನೆಯೊಂದಿಗೆ ದಸರಾ ಮಹೋತ್ಸವವನ್ನು ಅತ್ಯಂತ ವಿಜೃಂಭಣೆಯಿಂದ ಆಚರಿಸಲಾಯಿತು.
ವಿಜಯದಶಮಿಯ ಶುಭ ಮುಹೂರ್ತದಲ್ಲಿ ಸ್ವಯಂಪ್ರೇರಿತರಾಗಿ ಆಗಮಿಸಿದ ಕಾರ್ಯಕರ್ತರು ಮಹಿಪಾಳಗಡದ ಐತಿಹಾಸಿಕ ಮಹಾದ್ವಾರವನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿ, ಬಣ್ಣಬಣ್ಣದ ಹೂವುಗಳಿಂದ ಅಲಂಕರಿಸಿ ಬೃಹತ್ ತೋರಣ ಕಟ್ಟಿದರು. ಪ್ರತಿಷ್ಠಾನದ ಬೆಳಗಾವಿ ವಿಭಾಗದ ಅಧ್ಯಕ್ಷೆ ಸೌ. ಗಾರ್ಗಿ ತಾಯಿ ಪಾಟೀಲ್ ಅವರ ಅಧ್ಯಕ್ಷತೆಯಲ್ಲಿ ಜರುಗಿದ ಈ ಕಾರ್ಯಕ್ರಮದಲ್ಲಿ ವಿಧಿವತ್ತಾಗಿ ಕಲಶ ಪೂಜೆ ಹಾಗೂ ಶಸ್ತ್ರಪೂಜೆ ನೆರವೇರಿಸಿ, ಛತ್ರಪತಿ ಶಿವಾಜಿ ಮಹಾರಾಜರ ಜೈಕಾರದೊಂದಿಗೆ ಕೋಟೆಗಳ ರಕ್ಷಣೆಯ ಜಂಟಿ ಶಪಥ ಸ್ವೀಕರಿಸಲಾಯಿತು. ಪ್ರತಿಷ್ಠಾನದ ಸಂಸ್ಥಾಪಕ ಅಧ್ಯಕ್ಷ ಯೋಗೇಶ್ ಸೋನವಣೆ ಅವರ ಪರಿಕಲ್ಪನೆಗೆ ಅನುಗುಣವಾಗಿ, ಮಹಿಪಾಳಗಡ ಗ್ರಾಮ ಪಂಚಾಯಿತಿ ಹಾಗೂ ಸ್ಥಳೀಯ ಗ್ರಾಮಸ್ಥರ ಸಕ್ರಿಯ ಸಹಯೋಗದೊಂದಿಗೆ ಹಮ್ಮಿಕೊಳ್ಳಲಾಗಿದ್ದ ಈ ವಿಶಿಷ್ಟ ಕಾರ್ಯಕ್ರಮವು ಹೊಸ ಪೀಳಿಗೆಯಲ್ಲಿ ಐತಿಹಾಸಿಕ ಸ್ಮಾರಕಗಳ ಸಂರಕ್ಷಣೆಯ ಕುರಿತು ಜಾಗೃತಿ ಮೂಡಿಸುವಲ್ಲಿ ಯಶಸ್ವಿಯಾಯಿತು.
