ಬೆಳಗಾವಿ ತಾಲೂಕಿನ ಯಳ್ಳೂರಿನಲ್ಲಿ ಶ್ರೀ ಚಾಂಗಳೇಶ್ವರಿ ದೇವಿ ವಿಶ್ವಸ್ತ ಮಂಡಳಿಯ ವತಿಯಿಂದ ವಿಜಯದಶಮಿಯ ಶುಭ ಮುಹೂರ್ತದಂದು ‘ಶ್ರೀ ಮಾವುಲಿ ಸಂಗೀತ ಸೋಂಗಿ ಭಜನಾ ಮಂಡಳಿ’ಯಿಂದ ವಿಶೇಷ ಸಂಗೀತ ಭಜನೆ ಹಾಗೂ ವಿವಿಧ ಕ್ಷೇತ್ರಗಳ ಸಾಧಕರಿಗೆ ಸನ್ಮಾನ ಕಾರ್ಯಕ್ರಮ ವೈಭವದಿಂದ ನೆರವೇರಿತು. ವಿಜಯದಶಮಿಯ ರಾತ್ರಿ ದೇವಿಯ ಜಾಗರಣೆಯ ಸಾಂಪ್ರದಾಯಿಕ ಆಚರಣೆಗೆ ಈ ಧಾರ್ಮಿಕ-ಸಾಂಸ್ಕೃತಿಕ ಕಾರ್ಯಕ್ರಮವು ಮತ್ತಷ್ಟು ಕಳೆ ತಂದಿತು.
ಯಳ್ಳೂರಿನ ಚಾಂಗಳೇಶ್ವರಿ ದೇವಾಲಯದ ಆವರಣದಲ್ಲಿ ಮಂಡಳಿಯ ಅಧ್ಯಕ್ಷ ನಾರಾಯಣ ಕಂಗ್ರಾಳಕರ್ ಅಧ್ಯಕ್ಷತೆಯಲ್ಲಿ ಜರುಗಿದ ಕಾರ್ಯಕ್ರಮವನ್ನು ನಿವೃತ್ತ ಜಿಲ್ಲಾ ಕ್ರೀಡಾಧಿಕಾರಿ ವಿಲಾಸ್ ಘಾಡಿ, ಉದ್ಯಮಿಗಳಾದ ಅಮಿತ್ ಪಾಟೀಲ್ ಹಾಗೂ ರೋಹನ್ ಹಾಂಗೀರಗೇಕರ್ ದೀಪ ಬೆಳಗಿಸಿ ಉದ್ಘಾಟಿಸಿದರು. ಈ ಸಂದರ್ಭದಲ್ಲಿ ದಸರಾ ಸಿ.ಎಂ. ಕಪ್ ಕುಸ್ತಿ ಪಟು ವಿನಾಯಕ್ ಪಾಟೀಲ್, ಪ್ರತಿಯೊಬ್ಬ ನಿವೃತ್ತ ಯೋಧರು ಹಾಗೂ ಗ್ರಾಮದ ವಿವಿಧ ಸಾಧಕರು ಮತ್ತು ಸೋಷಿಯಲ್ ಮೀಡಿಯಾ ಕಾರ್ಯಕರ್ತರನ್ನು ಮುಖಂಡರು ಹಾಗೂ ದೇವಾಲಯದ ಟ್ರಸ್ಟಿಗಳ ಉಪಸ್ಥಿತಿಯಲ್ಲಿ ಆತ್ಮೀಯವಾಗಿ ಗೌರವಿಸಲಾಯಿತು. ಕೊಲ್ಲಾಪುರದ ಆಜರಾ ತಾಲೂಕಿನ ‘ಶ್ರೀ ಮಾವುಲಿ’ ತಂಡದಿಂದ ಮೂಡಿಬಂದ ಸೊಗಸಾದ ಸಂಗೀತ ಸೋಂಗಿ ಭಜನೆಯು ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಿದ್ದು, ಯಳ್ಳೂರು ಹಾಗೂ ಸುತ್ತಮುತ್ತಲಿನ ನೂರಾರು ಭಕ್ತಾದಿಗಳು ರಾತ್ರಿಪೂರ್ತಿ ಪಾಲ್ಗೊಂಡು ದೇವಿಯ ಕೃಪೆಗೆ ಪಾತ್ರರಾದರು.
