ಶ್ರಾವಣ ಮಾಸದ ಪವಿತ್ರ ಸಂದರ್ಭದಲ್ಲಿ ನಿಪ್ಪಾಣಿಯ ಅಡಿ ದತ್ತ ಮಂದಿರದ ಆವರಣದಲ್ಲಿ ಭಕ್ತಿ ಮತ್ತು ಪರಿಸರ ಕಾಳಜಿಯ ಸಮ್ಮಿಲನದ ಕಾರ್ಯಕ್ರಮವೊಂದು ನೆರವೇರಿದೆ. ಸರ್ವ ಲೋಕ್ ಸೇವಾ ಫೌಂಡೇಶನ್ ವತಿಯಿಂದ ಪೂಜ್ಯ ಪರಮಾತ್ಮ ಮಹಾರಾಜರ ದಿವ್ಯ ಸಾನ್ನಿಧ್ಯದಲ್ಲಿ ಬಿಲ್ವಪತ್ರ ಹಾಗೂ ರುದ್ರಾಕ್ಷಿ ಸಸಿಗಳನ್ನು ನೆಡುವ ಮೂಲಕ ಶ್ರಾವಣ ಆಚರಣೆಗೆ ಅದ್ಧೂರಿ ಚಾಲನೆ ನೀಡಲಾಗಿದೆ.

ಪವಿತ್ರ ಶ್ರಾವಣ ಮಾಸದ ಶುಭಾರಂಭದ ನಿಮಿತ್ತ ಸರ್ವ ಲೋಕ್ ಸೇವಾ ಫೌಂಡೇಶನ್ ವೀರೇಶ್ ಬಸಯ್ಯ ಹಿರೇಮಠ್ ಅವರ ನೇತೃತ್ವದಲ್ಲಿ ಆಡಿ (ನಿಪ್ಪಾಣಿ) ಗ್ರಾಮದ ಪ್ರಸಿದ್ಧ ದತ್ತ ಮಂದಿರದ ಪರಿಸರದಲ್ಲಿ ವಿಶೇಷ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು. ಪರಮ ಪೂಜ್ಯ ಪರಮಾತ್ಮ ಮಹಾರಾಜರು ತಮ್ಮ ಅಮೃತ ಹಸ್ತದಿಂದ ಬಿಲ್ವಪತ್ರ ಮತ್ತು ರುದ್ರಾಕ್ಷಿ ಸಸಿಗಳನ್ನು ನೆಡುವ ಮೂಲಕ ಈ ಬಾರಿಯ ಶ್ರಾವಣ ಮಾಸದ ಆಚರಣೆಯನ್ನು ಶ್ರದ್ಧಾ-ಭಕ್ತಿಗಳಿಂದ ಪ್ರಾರಂಭಿಸಿದರು. ಇದೇ ವೇಳೆ, ಸಾರ್ವಜನಿಕರಿಗೆ ಹಾಗೂ ಭಕ್ತಾದಿಗಳಿಗೆ ಉಚಿತವಾಗಿ ಬಿಲ್ವಪತ್ರಿ ಸಸಿಗಳನ್ನು ವಿತರಿಸುವುದಾಗಿ ವೀರೇಶ್ ಬಸಯ್ಯ ಹಿರೇಮಠ್ ಪ್ರಕಟಿಸಿದರು. ಈ ಮಾದರಿ ಸೇವಾ ಕಾರ್ಯಕ್ರಮದಲ್ಲಿ ಪೂಜ್ಯ ಪರಮಾತ್ಮ ಮಹಾರಾಜರು, ವೀರೇಶ್ ಬಸಯ್ಯ ಹಿರೇಮಠ್, ಪುಂಡಲೀಕ್ ಕುಂಡೇಕರ್, ದೇವಿದಾಸ್ ಮಹಾರಾಜ್ ಹಾಗೂ ಗೌರೀಶ್ ವಿ. ಹಿರೇಮಠ್ ಸೇರಿದಂತೆ ಅನೇಕ ಗಣ್ಯರು ಭಾಗವಹಿಸಿ ಪೂಜಾ ಕೈಂಕರ್ಯಗಳನ್ನು ನೆರವೇರಿಸಿದರು