ಖಾನಾಪುರದ ಮರಾಠಾ ಮಂಡಳ ಶಾಲೆಯಲ್ಲಿ ಕಾರ್ಯಕ್ರಮ
ಬ್ರಹ್ಮಕುಮಾರಿ ಸಂಸ್ಥೆಯ ಸಹಯೋಗದಲ್ಲಿ ಆಯೋಜನೆ
ಮೊಬೈಲ್ ಸೇರಿದಂತೆ ದುರಭ್ಯಾಸಗಳಿಂದ ದೂರವಿರಲು ಸಲಹೆ
ಸುಮಾರು 600 ವಿದ್ಯಾರ್ಥಿಗಳ ಭಾಗಿ

ಖಾನಾಪುರ ಮರಾಠಾ ಮಂಡಳ ಹೈಯರ್ ಸೆಕಂಡರಿ ಶಾಲೆ ಹಾಗೂ ಪ್ರಜಾಪಿತ ಬ್ರಹ್ಮಕುಮಾರಿ ಈಶ್ವರೀಯ ವಿಶ್ವವಿದ್ಯಾಲಯದ ಸಂಯುಕ್ತಾಶ್ರಯದಲ್ಲಿ ವ್ಯಸನ ಮುಕ್ತಿ ದಿನಾಚರಣೆಯನ್ನು ಆಚರಿಸಲಾಯಿತು.

ಈ ವೇಳೆ ಮುಖ್ಯ ಅತಿಥಿಯಾಗಿ ಆಗಮಿಸಿದ್ದ ಬ್ರಹ್ಮಕುಮಾರಿ ವಿದ್ಯಾಲಯದ ಬಿ. ಕೆ. ಪದ್ಮಾ ಮಾತನಾಡಿ, “ಇಂದಿನ ವಿದ್ಯಾರ್ಥಿಗಳು ಮದ್ಯಪಾನ, ಸಿಗರೇಟ್, ತಂಬಾಕು, ಗುಟ್ಕಾ ಮುಂತಾದ ಅನೇಕ ರೀತಿಯ ದುರಭ್ಯಾಸಗಳಿಗೆ ಬಲಿಯಾಗುತ್ತಿದ್ದಾರೆ. ಇದರ ಜೊತೆಗೆ ‘ಮೊಬೈಲ್’ ಎಂಬ ಹೊಸ ವ್ಯಸನ ಹುಟ್ಟಿಕೊಂಡಿದ್ದು, ಮಕ್ಕಳು ಅದರಲ್ಲಿ ಎಷ್ಟು ಮುಳುಗಿದ್ದಾರೆಂದರೆ ಅವರನ್ನು ಹೊರತರುವುದು ಕಷ್ಟವಾಗುತ್ತಿದೆ. ಆದ್ದರಿಂದ ವಿದ್ಯಾರ್ಥಿಗಳು ಮೊಬೈಲ್ ಸೇರಿದಂತೆ ಯಾವುದೇ ದುರಭ್ಯಾಸಕ್ಕೆ ಒಳಗಾಗದೆ ತಮ್ಮ ಸಂಪೂರ್ಣ ಗಮನವನ್ನು ಅಭ್ಯಾಸದತ್ತ ಹರಿಸಬೇಕು. ತಮ್ಮ ಹಾಗೂ ಕುಟುಂಬದ ಅಭಿವೃದ್ಧಿಯತ್ತ ಯೋಚಿಸಬೇಕು,” ಎಂದು ಕರೆ ನೀಡಿದರು.ಶಾಲೆಯ ಮುಖ್ಯೋಪಾಧ್ಯಾಯ ಕೆ. ವಿ. ಕುಲಕರ್ಣಿ ಮಾತನಾಡಿ, ವಿದ್ಯಾರ್ಥಿಗಳು ಯಾವುದೇ ದುರಭ್ಯಾಸಕ್ಕೆ ಒಳಗಾಗದೆ ತಮ್ಮ ಗಮನವನ್ನು ಶಿಕ್ಷಣದತ್ತ ಕೇಂದ್ರೀಕರಿಸಿ, ಹೊಸ ಪುಸ್ತಕಗಳನ್ನು ಓದುವ ಮೂಲಕ ಜ್ಞಾನಾರ್ಜನೆ ಮಾಡಿಕೊಳ್ಳಬೇಕು ಎಂದು ತಿಳಿಸಿದರು.
ಈ ಸಂದರ್ಭದಲ್ಲಿ ಶಾಲೆಯ ಹಿರಿಯ ಶಿಕ್ಷಕರಾದ ಎಸ್. ಎಂ. ಮುತಗಿ, ಆರ್. ಟಿ. ಪತ್ರಿ, ವೈ. ಎಫ್. ನಿಲಜಕರ್, ಶ್ರೀಮತಿ ಎಸ್. ಬಿ. ಭಾತಖಂಡೆ ಸೇರಿದಂತೆ ಇತರ ಶಿಕ್ಷಕರು ಉಪಸ್ಥಿತರಿದ್ದರು. ಕಾರ್ಯಕ್ರಮದಲ್ಲಿ ಸುಮಾರು 600ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಭಾಗವಹಿಸಿದ್ದರು.