ಉತ್ತರ ಕರ್ನಾಟಕದ ಆಧ್ಯಾತ್ಮಿಕ ಇತಿಹಾಸದಲ್ಲಿ ಮಹತ್ವದ ಮೈಲಿಗಲ್ಲಾಗಲಿರುವ ಧಾರವಾಡದ ರಾಯಾಪುರ ಬಳಿಯಲ್ಲಿ ಇಸ್ಕಾನ್ ಶ್ರೀ ಶ್ರೀ ರಾಧಾ ಗೋವಿಂದ ದೇವಜಿ ಮಂದಿರದ ಆಗಸ್ಟ್ 10ರಂದು ಸಾರ್ವಜನಿಕ ದರ್ಶನಕ್ಕೆ ತೆರೆಯಲಾಗುತ್ತದೆ ಎಂದು ಹುಬ್ಬಳ್ಳಿ ಧಾರವಾಡ ಇಸ್ಕಾನ್ ಅಧ್ಯಕ್ಷರಾದ ಶ್ರೀ ರಾಜೀವ್ ಲೋಚನ ದಾಸ್ ಮಾಹಿತಿ ನೀಡಿದರು.

ಈ ಕುರಿತು ಧಾರವಾಡ ರಾಯಾಪುರದ ಇಸ್ಕಾನ್ ಮಂದಿರದಲ್ಲಿ ಮಾಧ್ಯಮಗೋಷ್ಠಿ ಏರ್ಪಡಿಸಿ ಮಾತನಾಡಿದ ಅವರು, ಈ ಮಂದಿರವು ಪ್ರದೇಶದ ಆಧ್ಯಾತ್ಮಿಕ, ಸಾಂಸ್ಕೃತಿಕ ಹಾಗೂ ಶೈಕ್ಷಣಿಕ ಉನ್ನತಿಗೆ ಹೊಸ ಅಧ್ಯಾಯವನ್ನು ಆರಂಭಿಸಲಿದೆ. ವಿಗ್ರಹ ಪ್ರತಿಷ್ಠಾಪನೆ, ಮಂಡಲ ಪೂಜೆ ಹಾಗೂ ಸಾರ್ವಜನಿಕ ದರ್ಶನದ ವೇಳಾಪಟ್ಟಿ
ಶ್ರೀ ಶ್ರೀ ರಾಧಾ ಗೋವಿಂದ ದೇವಜಿಯವರ ಪವಿತ್ರ ಪ್ರಾಣ ಪ್ರತಿಷ್ಠಾ ಮಹೋತ್ಸವವು 2026ರ ಜೂನ್ 22ರಂದು ನೆರವೇರಲಿದೆ. ಇದಕ್ಕೂ ಮುನ್ನ, 2026ರ ಜೂನ್ 18ರಿಂದ ಆಗಮ ಶಾಸ್ತ್ರ ಮತ್ತು ಪ್ರಾಚೀನ ದೇವಾಲಯ ಸಂಪ್ರದಾಯಗಳ ಅನುಸಾರ ವಿವಿಧ ವೇದಿಕ ಮತ್ತು ಆಗಮ ವಿಧಿವಿಧಾನಗಳು ನಡೆಯಲಿವೆ. ಪ್ರತಿಷ್ಠಾಪನೆಯ ನಂತರ, ಆಗಮ ಶಾಸ್ತ್ರದ ನಿರ್ದೇಶನದಂತೆ 2026ರ ಜೂನ್ 23ರಿಂದ ಆಗಸ್ಟ್ 9ರವರೆಗೆ 48 ದಿನಗಳ ಮಂಡಲ ಪೂಜೆ ನಡೆಯಲಿದೆ.
ಈ ಪವಿತ್ರ ಆಚರಣೆಗಳ ಸುಗಮ ನಿರ್ವಹಣೆಗೆ, ಹೊಸದಾಗಿ ನಿರ್ಮಿಸಲಾದ ದೇವಾಲಯವು 2026ರ ಜೂನ್ 18ರಿಂದ ಆಗಸ್ಟ್ 9ರವರೆಗೆ ಸಾರ್ವಜನಿಕರಿಗೆ ಮುಚ್ಚಲ್ಪಟ್ಟಿರುತ್ತದೆ. ಈ ಅವಧಿಯಲ್ಲಿ ಹೊಸ ದೇವಾಲಯದಲ್ಲಿ ಸಾರ್ವಜನಿಕ ಪ್ರವೇಶ ಮತ್ತು ದರ್ಶನಕ್ಕೆ ಅವಕಾಶ ಇರುವುದಿಲ್ಲ. ದೇವಾಲಯವು ಅಧಿಕೃತವಾಗಿ 2026ರ ಆಗಸ್ಟ್ 10ರಂದು ಸಾರ್ವಜನಿಕ ದರ್ಶನಕ್ಕೆ ತೆರೆಯಲ್ಪಡಲಿದೆ. ವಿಶಿಷ್ಟ ಆಧ್ಯಾತ್ಮಿಕ ಮತ್ತು ಸಾಂಸ್ಕೃತಿಕ ಸ್ಮಾರಕ ಪ್ರಸ್ತುತ ದೇವಾಲಯವು ಹುಬ್ಬಳ್ಳಿ–ಧಾರವಾಡ ರಸ್ತೆಯ ಮಟ್ಟದಿಂದ ಸುಮಾರು 110 ಅಡಿ ಎತ್ತರದಲ್ಲಿದೆ. ಭವ್ಯವಾದ 90 ಅಡಿ ಎತ್ತರದ ಗೋಪುರದ ನಿರ್ಮಾಣ ಪೂರ್ಣಗೊಂಡ ಬಳಿಕ, ದೇವಾಲಯದ ಒಟ್ಟು ಎತ್ತರವು ರಸ್ತೆ ಮಟ್ಟದಿಂದ ಸುಮಾರು 200 ಅಡಿಗಳಾಗಲಿದ್ದು, ಇದು ಉತ್ತರ ಕರ್ನಾಟಕದ ಪ್ರಮುಖ ಆಧ್ಯಾತ್ಮಿಕ ಹೆಗ್ಗುರುತುಗಳಲ್ಲಿ ಒಂದಾಗಲಿದೆ ಎಂದು ತಿಳಿಸಿದರು.