• ಬೆಳಗಾವಿ ನ್ಯಾಯಾಲಯದ ಆವರಣದಲ್ಲಿ ಮಾನವೀಯತೆ
• ಕೊಳೆತ ಕಾಲಿನಿಂದ ನರಳುತ್ತಿದ್ದ ವ್ಯಕ್ತಿಯ ರಕ್ಷಣೆ
• ವಕೀಲರು ಹಾಗೂ ಸಮಾಜ ಸೇವಕರಿಂದ ಸಾಹಸ
• ಗಂಭೀರ ಸ್ಥಿತಿಯಲ್ಲಿದ್ದ ವ್ಯಕ್ತಿ ಸಿವಿಲ್ ಆಸ್ಪತ್ರೆಗೆ ದಾಖಲು
ನ್ಯಾಯ ಒದಗಿಸಿಕೊಡುವ ನ್ಯಾಯಾಲಯದ ಆವರಣದಲ್ಲೇ ಇಂದು ಜೀವವೊಂದಕ್ಕೆ ಮರುಜನ್ಮ ನೀಡುವ ಕಾರ್ಯ ನಡೆದಿದೆ. ತೀವ್ರ ಅನಾರೋಗ್ಯದಿಂದ ನರಳುತ್ತಿದ್ದ ವ್ಯಕ್ತಿಯೊಬ್ಬರ ರಕ್ಷಣೆಗೆ ಧಾವಿಸಿದ ಸಾಮಾಜಿಕ ಕಾರ್ಯಕರ್ತರು ಮತ್ತು ವಕೀಲರ ತಂಡದ ಶ್ಲಾಘನೀಯ ಕಾರ್ಯ ಮಾಡಿದೆ.
ಬೆಳಗಾವಿಯ ನ್ಯಾಯಾಲಯದ ಆವರಣದಲ್ಲಿ ಗಂಭೀರ ಸ್ಥಿತಿಯಲ್ಲಿದ್ದ ಅನಾಮಧೇಯ ವ್ಯಕ್ತಿಯೊಬ್ಬರನ್ನು ಸಾಮಾಜಿಕ ಕಾರ್ಯಕರ್ತರು ಮತ್ತು ವಕೀಲರ ತಂಡ ಇಂದು ರಕ್ಷಿಸಿದೆ. ತಾನು ವಕೀಲನೆಂದು ಹೇಳಿಕೊಳ್ಳುತ್ತಿದ್ದ ಈ ವ್ಯಕ್ತಿಯ ಕಾಲು ತೀವ್ರವಾದ ಸೋಂಕಿನಿಂದ ಕೊಳೆತು ಹೋಗಿದ್ದು, ನಡೆಯಲಾಗದ ಸ್ಥಿತಿಯಲ್ಲಿ ನರಳುತ್ತಿದ್ದರು. ವಿಷಯ ತಿಳಿಯುತ್ತಿದ್ದಂತೆಯೇ ಸಾಮಾಜಿಕ ಕಾರ್ಯಕರ್ತರಾದ ಅವಧೂತ ತುಡವೇಕರ, ಅಲನ್ ವಿಜಯ್ ಮೋರೆ, ಪದ್ಮಪ್ರಸಾದ್ ಹುಲಿ ಹಾಗೂ ವಕೀಲ ರೋಹಿತ್ ಕಡಗಾವಿ ನೇತೃತ್ವದ ತಂಡ ತಕ್ಷಣ ಸ್ಥಳಕ್ಕೆ ಧಾವಿಸಿ ವ್ಯಕ್ತಿಯ ನೆರವಿಗೆ ನಿಂತಿತು.
ಕಾಲು ಅತಿಯಾಗಿ ಕೊಳೆತು ಹೋಗಿದ್ದರಿಂದ ಆತನಿಗೆ ತಕ್ಷಣದ ವೈದ್ಯಕೀಯ ಚಿಕಿತ್ಸೆಯ ಅಗತ್ಯವಿದ್ದುದನ್ನು ಮನಗಂಡ ತಂಡವು, ಪ್ರಥಮ ಚಿಕಿತ್ಸೆ ನೀಡಿ ಕೂಡಲೇ ಬೆಳಗಾವಿಯ ಜಿಲ್ಲಾ ಆಸ್ಪತ್ರೆಗೆ (ಸಿವಿಲ್ ಆಸ್ಪತ್ರೆ) ದಾಖಲಿಸಿದೆ. ಸದ್ಯ ವ್ಯಕ್ತಿಯು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ವೈದ್ಯರು ಅವರ ಸ್ಥಿತಿಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದಾರೆ. ಆಪತ್ಕಾಲದಲ್ಲಿ ಸ್ಪಂದಿಸಿದ ವಕೀಲರ ಮತ್ತು ಸಮಾಜ ಸೇವಕರ ಈ ಮಾನವೀಯ ಕಾರ್ಯಕ್ಕೆ ಸಾರ್ವಜನಿಕ ವಲಯದಲ್ಲಿ ದೊಡ್ಡ ಮಟ್ಟದ ಮೆಚ್ಚುಗೆ ವ್ಯಕ್ತವಾಗಿದೆ.
