ಕಬ್ಬಿಗೆ ಪ್ರತಿ ಟನ್‌ಗೆ ₹5,500 ಬೆಲೆ ನಿಗದಿಪಡಿಸಬೇಕು ಎಂದು ಆಗ್ರಹಿಸಿ ನಡೆಯುತ್ತಿರುವ ರೈತರ ಹೋರಾಟದ ಭಾಗವಾಗಿ, ರಾಜ್ಯ ರೈತ ಸಂಘದ ಗೌರವಾಧ್ಯಕ್ಷ ಶಶಿಕಾಂತ್ ಗೂರುಜಿ ಅವರು ಮಾಧ್ಯಮಗಳೊಂದಿಗೆ ಮಾತನಾಡಿ ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ್ದಾರೆ.

​ಗುರ್ಲಾಪೂರದಲ್ಲಿ ನಡೆಯುತ್ತಿರುವ ಪ್ರತಿಭಟನಾ ಸ್ಥಳದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, “ಇಂದು ಬೆಳಗಾವಿಯ ಸುವರ್ಣಸೌಧದಲ್ಲಿ ಸಿಎಂ ಡಿ.ಕೆ. ಶಿವಕುಮಾರ್ ಅವರ ನೇತೃತ್ವದಲ್ಲಿ, ಸಕ್ಕರೆ ಕಾರ್ಖಾನೆಗಳ ಮಾಲೀಕರು ಜಿಲ್ಲಾಧಿಕಾರಿಗಳು ಹಾಗೂ ಸಚಿವರ ಉಪಸ್ಥಿತಿಯಲ್ಲಿ ಹೈ-ವೋಲ್ಟೇಜ್ ಸಭೆ ಕರೆಯಲಾಗಿದೆ. ಈ ಸಭೆಯಲ್ಲಿ ರೈತರ ಬೇಡಿಕೆಗೆ ಪೂರಕವಾದ ನಿರ್ಧಾರ ಹೊರಬರಲಿದೆ ಎಂಬ ಭರವಸೆ ನಮಗಿದೆ” ಎಂದು ತಿಳಿಸಿದರು.

​ಸುವರ್ಣಸೌಧದ ಸಭೆಯಲ್ಲಿ ರೈತರ ಬೇಡಿಕೆಯಂತೆ ₹5,500 ಪೂರಕ ಬೆಲೆ ನೀಡಲು ಸರ್ಕಾರ ಹಾಗೂ ಸಕ್ಕರೆ ಕಾರ್ಖಾನೆ ಮಾಲೀಕರು ಸಮ್ಮತಿಸಿದರೆ, ಇಂದು ಸಂಜೆ 8 ರಿಂದ 9 ಗಂಟೆಯೊಳಗೆ ಧರಣಿ ಹೋರಾಟವನ್ನು ಹಿಂಪಡೆಯಲಾಗುವುದು. ಒಂದು ವೇಳೆ ಸಭೆಯು ವಿಫಲವಾದರೆ ಅಥವಾ ರೈತರ ಬೇಡಿಕೆಗೆ ಸಕಾರಾತ್ಮಕ ಸ್ಪಂದನೆ ಸಿಗದಿದ್ದರೆ, ರಾತ್ರಿ 9 ಗಂಟೆಯ ನಂತರ ಮುಂದಿನ ಹೋರಾಟ ಹಾಗೂ ಬಂದ್ ಕಾರ್ಯರೂಪದ ಸ್ವರೂಪವನ್ನು ಬದಲಾಯಿಸಲಾಗುವುದು ಎಂದು ಎಚ್ಚರಿಕೆ ನೀಡಿದರು.

​ಕಾರ್ಖಾನೆ ಮಾಲೀಕರು ನಷ್ಟದಲ್ಲಿದ್ದೇವೆ ಎಂದು ಹೇಳುತ್ತಿರುವುದನ್ನು ತಳ್ಳಿಹಾಕಿದ ಅವರು, “ಹಿಂದೆ ಸಕ್ಕರೆ ಬೆಲೆ ಕೆಜಿಗೆ ₹38 ಇದ್ದಾಗ ₹3,300 ನೀಡುತ್ತಿದ್ದರು. ಈಗ ಸಕ್ಕರೆ ದರ ಕೆಜಿಗೆ ₹52 ರಿಂದ ₹54 ಕ್ಕೇರಿದ್ದು, ಹಬ್ಬಗಳ ಸಮಯದಲ್ಲಿ ₹70-80 ತಲುಪುತ್ತದೆ. ಅಲ್ಲದೆ ಸಕ್ಕರೆಯ ಜೊತೆಗೆ ಮೊಲ್ಯಾಸಿಸ್, ಈಥನಾಲ್ ಹಾಗೂ ಸ್ಪಿರಿಟ್‌ನಂತಹ ಉಪ ಉತ್ಪನ್ನಗಳಿಂದ ಕಾರ್ಖಾನೆಗಳು ಭಾರಿ ಲಾಭ ಗಳಿಸುತ್ತಿವೆ” ಎಂದು ಅಂಕಿ-ಅಂಶಗಳ ಸಮೇತ ವಿವರಿಸಿದರು.

​ಸಸರ್ಕಾರ ಮತ್ತು ಸಕ್ಕರೆ ಕಾರ್ಖಾನೆಗಳು ಸೇರಿ ರೈತರಿಗೆ ಒಟ್ಟಾರೆಯಾಗಿ ಸೂಕ್ತ ಬೆಲೆ (₹5,500) ತಲುಪುವಂತೆ ಮಾಡಬೇಕು. ಯಾವುದೇ ಪಕ್ಷ, ಜಾತಿ, ಧರ್ಮದ ಭೇದವಿಲ್ಲದೆ ಎಲ್ಲಾ ರೈತರು ಮತ್ತು ಕಾರ್ಯಕರ್ತರು ಒಗ್ಗೂಡಿ ಈ ಹೋರಾಟ ಮಾಡುತ್ತಿದ್ದು, ರೈತರ ಹಿತ ಕಾಯುವುದು ಸರ್ಕಾರದ ಜವಾಬ್ದಾರಿಯಾಗಿದೆ ಎಂದು ಮನವಿ ಮಾಡಿದರು.