ಧಾಮಣೆ ಯಳ್ಳೂರಿನಿಂದ ಪಂಡರಪುರಕ್ಕೆ ಪಾದಯಾತ್ರೆ ಮೂಲಕ ತೆರಳುತ್ತಿದ್ದ ವಾರಕರಿ ಮಹಿಳೆಯೊಬ್ಬರು ಹೃದಯಾಘಾತದಿಂದ ಸಾವನ್ನಪ್ಪಿರುವ ದುಃಖದ ಘಟನೆ ಚಿಕ್ಕೋಡಿ ಬಳಿ ಸಂಭವಿಸಿದೆ. ಪಾದಯಾತ್ರೆಯ ಮಧ್ಯೆಯೇ ಕಣ್ಣು ಮುಚ್ಚಿದ ಮಹಿಳೆಯ ಸಾವಿನಿಂದಾಗಿ ಪಾಂಡುರಂಗನ ದರ್ಶನ ಪಡೆಯಬೇಕೆಂಬ ಅವರ ಕೊನೆಯ ಆಸೆ ಈಡೇರದೆ ಅರ್ಧಕ್ಕೆ ನಿಂತಂತಾಗಿದೆ.

ಬೆಳಗಾವಿ ತಾಲೂಕಿನ ಏಳೂರು ಗ್ರಾಮದ ಧರ್ಮರಾಜ ಗಲ್ಲಿಯ ನಿವಾಸಿ ಶಾಲನ್ ಪ್ರಕಾಶ್ ಸಾಯನೇಕರ್ (59) ಮೃತಪಟ್ಟ ದುರ್ದೈವಿ ವಾರಕರಿ ಮಹಿಳೆಯಾಗಿದ್ದಾರೆ. ಕಳೆದ ಸೋಮವಾರ ಜುಲೈ 13 ರಂದು ಯಳ್ಳೂರಿನ ವೈಷ್ಣವ ಸದನ ಆಶ್ರಮದಿಂದ ಪಂಡರಪುರಕ್ಕೆ ಹೊರಟಿದ್ದ ಪಾದಯಾತ್ರೆಯಲ್ಲಿ ಇವರು ಅತ್ಯಂತ ಉತ್ಸಾಹದಿಂದ ಪಾಲ್ಗೊಂಡಿದ್ದರು. ಗುರುವಾರದವರೆಗೆ ಯಾವುದೇ ತೊಂದರೆ ಇಲ್ಲದೆ ಹೆಜ್ಜೆ ಹಾಕಿದ್ದ ಶಾಲನ್ ಅವರಿಗೆ ರಾತ್ರಿ 1:30 ರ ಸುಮಾರಿಗೆ ಹಠಾತ್ ಎದೆನೋವು ಕಾಣಿಸಿಕೊಂಡಿದೆ. ತಕ್ಷಣವೇ ದಿಂಡಿ ಸಂಚಾಲಕರು ಅವರನ್ನು ಚಿಕ್ಕೋಡಿಯ ಕೆ.ಎಲ್.ಇ ಆಸ್ಪತ್ರೆಗೆ ಹಾಗೂ ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಚಿಕ್ಕೋಡಿ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿದರಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಅವರು ಕೊನೆಯುಸಿರೆಳೆದಿದ್ದಾರೆ. ಮೊದಲ ಬಾರಿಗೆ ಪಾದಯಾತ್ರೆ ಕೈಗೊಂಡಿದ್ದ ಇವರು ದಿಂಡಿಯಲ್ಲೇ ಮೃತಪಟ್ಟಿರುವುದರಿಂದ ಅವರಿಗೆ ಮೋಕ್ಷ ಸಿಕ್ಕಿದೆ ಎಂದು ವಾರಕರಿಗಳು ಭಾವುಕರಾಗಿ ನುಡಿದಿದ್ದಾರೆ. ಮೃತರ ಪಾರ್ಥಿವ ಶರೀರವನ್ನು ಇಂದು ಬೆಳಿಗ್ಗೆ ಯಳ್ಳೂರಿನ ನಿವಾಸಕ್ಕೆ ತರಲಾಗಿದ್ದು, ಮೃತರು ಪತಿ, ಇಬ್ಬರು ವಿವಾಹಿತ ಪುತ್ರಿಯರು, ಒಬ್ಬ ವಿವಾಹಿತ ಪುತ್ರ, ಮೈದುನ ಹಾಗೂ ನವಹಿಂದ್ ಸೊಸೈಟಿಯ ಚೇರ್ಮನ್ ಶಿವಾಜಿರಾವ್ ಸಾಯನೇಕರ್ ಸೇರಿದಂತೆ ದೊಡ್ಡ ಕುಟುಂಬವಿದ್ದು, ಇಂದು ಬೆಳಿಗ್ಗೆ 11 ಗಂಟೆಗೆ ಏಳೂರಿನ ಫುಟುಕ್ ಕೆರೆ ಸ್ಮಶಾನಭೂಮಿಯಲ್ಲಿ ಅಂತ್ಯಕ್ರಿಯೆ ನೆರವೇರಿಸಲಾಯಿತು.