• ಬೆಳಗಾವಿ ಜಿಲ್ಲಾಸ್ಪತ್ರೆ ಮೇಲೆ ಬಾಂಬ್ ದಾಳಿ?!
• ಕಿರುಚಾಡಿದ ರೋಗಿಗಳು ಬೆಚ್ಚಿಬಿದ್ದ ಕುಂದಾನಗರಿ ಜನ
• ಜೀವ ಉಳಿಸಲು ಅಗ್ನಿಶಾಮಕ ದಳದ ಸಾಹಸ
• ವಿಪತ್ತು ನಿರ್ವಹಣೆಗೆ ನಡೆದ ಬೃಹತ್ ತಾಲೀಮು
ಬೆಳಗಾವಿಯ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಯಲ್ಲಿ ಇಂದು ಮಧ್ಯಾಹ್ನ ದಿಢೀರ್ ಬಾಂಬ್ ಸ್ಫೋಟದ ಸದ್ದು! ಆಸ್ಪತ್ರೆಯ ತುಂಬೆಲ್ಲಾ ದಟ್ಟವಾದ ಹೊಗೆ, ರೋಗಿಗಳ ಕಿರುಚಾಟ, ಅತ್ತ ಇತ್ತ ಓಡುತ್ತಿರುವ ಆಂಬುಲೆನ್ಸ್’ಗಳು! ಅಸಲಿಗೆ ಅಲ್ಲಿ ಆಗಿದ್ದೇನು? ಕುಂದಾನಗರಿಯ ಜನ ಬೆಚ್ಚಿಬಿದ್ದ ಆ ಕ್ಷಣಗಳ ಕಂಪ್ಲೀಟ್ ರಿಪೋರ್ಟ್ ಇಲ್ಲಿದೆ.”
ಬೆಳಗಾವಿಯ ಜಿಲ್ಲಾಸ್ಪತ್ರೆಯ ಆವರಣ ಇಂದು ರಣರಂಗದಂತೆ ಭಾಸವಾಗುತ್ತಿತ್ತು. ದಿಢೀರನೆ ಆಸ್ಪತ್ರೆಯ ಒಂದು ಭಾಗದಲ್ಲಿ ದಟ್ಟವಾದ ಹೊಗೆ ಆವರಿಸಿಕೊಂಡಿತು, ರೋಗಿಗಳು ಮತ್ತು ಅವರ ಸಂಬಂಧಿಕರು ಜೀವ ಉಳಿಸಿಕೊಳ್ಳಲು ಬಾಯಿ ಬಾಯಿ ಬಡಿದುಕೊಳ್ಳುತ್ತಾ ಹೊರಗೆ ಓಡಿ ಬರಲಾರಂಭಿಸಿದರು. ಭಯೋತ್ಪಾದಕರು ಬಾಂಬ್ ದಾಳಿ ನಡೆಸಿದ್ದಾರೆಯೇ ಎಂಬ ಭೀತಿ ಕ್ಷಣಕಾಲ ಎಲ್ಲರನ್ನು ಆವರಿಸಿತ್ತು. 7-8 ರೋಗಿಗಳು ರಕ್ತಸಿಕ್ತವಾಗಿ ಬಿದ್ದಿದ್ದರೆ, ಆಸ್ಪತ್ರೆಯ ಸಿಬ್ಬಂದಿಗಳು ದಿಕ್ಕು ತೋಚದಂತೆ ಗಾಬರಿಗೊಂಡ ಸನ್ನಿವೇಶ ಸೃಷ್ಟಿಯಾಗಿತ್ತು. ಇದೇ ವೇಳೆ ಸೈರನ್ ಮೊಳಗಿಸುತ್ತಾ ಬಂದ ಅಗ್ನಿಶಾಮಕ ವಾಹನಗಳು ಮತ್ತು ಎಸ್ಡಿಆರ್ಎಫ್ ಪಡೆ ಇಡೀ ಆಸ್ಪತ್ರೆಯನ್ನು ಸುತ್ತುವರೆದವು.
ಆದರೆ, ಈ ಆತಂಕದ ಕ್ಷಣಗಳು ಅಸಲಿಗೆ ಸಾರ್ವಜನಿಕರ ಜೀವ ರಕ್ಷಣೆಗಾಗಿ ಹಮ್ಮಿಕೊಂಡಿದ್ದ ‘ಟ್ರಾಯಾಸ್ ಮಾಕ್ ಡ್ರಿಲ್’ (Mock Drill) ಆಗಿತ್ತು. ಅಗ್ನಿಶಾಮಕ ದಳದ ಮುಖ್ಯ ಕಚೇರಿಯ ಆದೇಶದಂತೆ ರೆಡ್ ಕ್ರಾಸ್, ಸಿವಿಲ್ ಡಿಫೆನ್ಸ್ ಹಾಗೂ ಹೋಮ್ಗಾರ್ಡ್ಗಳ ಸಹಯೋಗದಲ್ಲಿ ಈ ಅಣಕು ಪ್ರದರ್ಶನ ಆಯೋಜಿಸಲಾಗಿತ್ತು. ಅಗ್ನಿಶಾಮಕ ಸಿಬ್ಬಂದಿಗಳು ಉಸಿರಾಟದ ಸುರಕ್ಷತಾ ಸಾಧನಗಳನ್ನು ಧರಿಸಿ, ಹೊಗೆ ತುಂಬಿದ ಕೊಠಡಿಗಳಿಂದ ರೋಗಿಗಳನ್ನು ಸಾಹಸಮಯವಾಗಿ ಹೊರತಂದರು. ಬಾಂಬ್ ದಾಳಿಯಂತಹ ತುರ್ತು ಪರಿಸ್ಥಿತಿ ಎದುರಾದರೆ ಜನರು ಹೇಗೆ ಸ್ಪಂದಿಸಬೇಕು ಮತ್ತು ಆಸ್ತಿ-ಪಾಸ್ತಿ ರಕ್ಷಣೆ ಮಾಡುವುದು ಹೇಗೆ ಎಂಬುದನ್ನು ನೈಜವಾಗಿ ತೋರಿಸಿಕೊಡಲಾಯಿತು.
ಘಟನಾ ಸ್ಥಳದಲ್ಲಿ ಹಗಲಿರುಳು ಶ್ರಮಿಸಿದ ಸಿಬ್ಬಂದಿಗಳು, ಗಂಭೀರವಾಗಿ ಗಾಯಗೊಂಡವರನ್ನು ತಕ್ಷಣವೇ ಬೇರೆ ಆಸ್ಪತ್ರೆಗೆ ಸ್ಥಳಾಂತರಿಸುವ ಮತ್ತು ಸ್ಥಳದಲ್ಲೇ ಪ್ರಥಮ ಚಿಕಿತ್ಸೆ ನೀಡುವ ತಾಲೀಮು ನಡೆಸಿದರು. ಈ ಬಗ್ಗೆ ಇನ್ ನ್ಯೂಸ್ಗೆ ಮಾಹಿತಿ ನೀಡಿದ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿ ರಂಗನಾಥ್, “ವಿಪತ್ತು ಸಂಭವಿಸಿದಾಗ ಗಾಬರಿಗೊಳ್ಳದೆ ಸಮಯಪ್ರಜ್ಞೆ ಮೆರೆಯುವುದೇ ಮುಖ್ಯ. ಜನರಲ್ಲಿ ಜಾಗೃತಿ ಮೂಡಿಸಲು ಈ ಕೃತಕ ವಿಪತ್ತಿನ ವಾತಾವರಣ ಸೃಷ್ಟಿಸಲಾಗಿತ್ತು” ಎಂದರು. ಈ ರೋಚಕ ಕಾರ್ಯಾಚರಣೆ ಕಂಡು ಬೆಳಗಾವಿ ಜನತೆ ಒಂದು ಕ್ಷಣ ಬೆಚ್ಚಿಬಿದ್ದರೂ, ಸುರಕ್ಷತಾ ಪಡೆಯ ಸನ್ನದ್ಧತೆಗೆ ಮೆಚ್ಚುಗೆ ವ್ಯಕ್ತಪಡಿಸಿದರು.
