ನನ್ನ 32 ವರ್ಷಗಳ ಶಿಕ್ಷಕ ವೃತ್ತಿ ಜೀವನದಲ್ಲಿ ಅಪಾರ ಅನುಭವಗಳು ಲಭಿಸಿವೆ. ವಿದ್ಯಾರ್ಥಿಗಳ ಒಡನಾಟದಲ್ಲಿ ನಾನು ಸದಾ ಮಗ್ನನಾಗಿದ್ದೆ” ಎಂದು ನಿವೃತ್ತ ಮುಖ್ಯಾಧ್ಯಾಪಕ ಎಸ್. ಎಲ್. ಭಕ್ತುರಿ ಭಾವುಕರಾಗಿ ನುಡಿದಿದ್ದಾರೆ. ಖಾನಾಪುರ ತಾಲೂಕಿನ ಗಣೇಬೈಲ್ ಉನ್ನತ ಪ್ರಾಥಮಿಕ ಮರಾಠಿ ಶಾಲೆಯ ಮುಖ್ಯಾಧ್ಯಾಪಕರಾಗಿದ್ದ ಭಕ್ತುರಿ ಅವರ ನಿವೃತ್ತಿ ಅಂಗವಾಗಿ ಆಯೋಜಿಸಲಾಗಿದ್ದ ಅದ್ಧೂರಿ ಸತ್ಕಾರ ಸಮಾರಂಭದಲ್ಲಿ ಅವರು ತಮ್ಮ ಮನದಾಳದ ಮಾತುಗಳನ್ನು ಹಂಚಿಕೊಂಡಿದ್ದಾರೆ.
ತೋಪಿನಕಟ್ಟಿ ಗ್ರಾ.ಪಂ. ಮಾಜಿ ಉಪಾಧ್ಯಕ್ಷ ಎಂ. ಕೆ. ಗುರವ್ ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ಸಮಾರಂಭದಲ್ಲಿ ನಿವೃತ್ತ ಮುಖ್ಯಾಧ್ಯಾಪಕ ಎಸ್. ಎಲ್. ಭಕ್ತುರಿ ತಮ್ಮ ಸುದೀರ್ಘ ಪಯಣವನ್ನು ನೆನಪಿಸಿಕೊಂಡರು. 1994 ರಲ್ಲಿ ವರಕಡ್ ಪಾಟೆಯ ಪೂರ್ವ ಪ್ರಾಥಮಿಕ ಶಾಲೆಯಿಂದ ವೃತ್ತಿ ಆರಂಭಿಸಿದ ಇವರು, ಬಳಿಕ ಜಟಗೇ ಹಾಗೂ ಹಾರೂರಿ ಶಾಲೆಗಳಲ್ಲಿ ಸೇವೆ ಸಲ್ಲಿಸಿದರು. ಇವರ ಅವಧಿಯಲ್ಲಿ ಶಾಲೆಗೆ ‘ಆದರ್ಶ ಶಾಲೆ’ ಪ್ರಶಸ್ತಿ ಲಭಿಸಿತ್ತು. ನಂತರ ಇದಲಹೊಂಡ ಸಿಆರ್ಪಿ ಆಗಿ, ಸಿಂಗಿನ್ಕೊಪ್ಪ ಶಾಲೆಯಲ್ಲಿ ಸೇವೆ ಸಲ್ಲಿಸುವಾಗ ‘ಪರಿಸರ ಪಕ್ಷಿ ಮಿತ್ರ’ ಪ್ರಶಸ್ತಿ ಮುಡಿಗೇರಿಸಿಕೊಂಡಿದ್ದರು. ತದನಂತರ ಕಾಟಗಾಳಿ ಮತ್ತು ಬರಗಾಂವ್ ಶಾಲೆಗಳಲ್ಲಿ ಮುಖ್ಯಾಧ್ಯಾಪಕರಾಗಿ ಕಾರ್ಯನಿರ್ವಹಿಸಿ, ಗಣೇಬೈಲ್ ಶಾಲೆಯಲ್ಲಿ ಸೇವೆ ಪೂರ್ಣಗೊಳಿಸಿದ್ದಾರೆ.
ಈ ಸಂದರ್ಭದಲ್ಲಿ ಬಿಇಒ ಕಚೇರಿ, ವಿವಿಧ ಶಾಲೆಗಳು ಹಾಗೂ ತೋಪಿನಕಟ್ಟಿ ಗ್ರಾಮಸ್ಥರ ಪರವಾಗಿ ಭಕ್ತುರಿ ದಂಪತಿಗಳನ್ನು ಶಾಲ, ಪುಷ್ಪಹಾರ ನೀಡಿ ಸನ್ಮಾನಿಸಲಾಯಿತು. ಕಾರ್ಯಕ್ರಮದಲ್ಲಿ ಪ್ರಭಾರಿ ಬಿಇಒ ಮಂಜುನಾಥ ಹತ್ತಿ, ಬಿಆರ್ಸಿ ಸಂತೋಷ್ ನಾಯ್ಕ್, ಮುಖ್ಯಾಧ್ಯಾಪಕ ಎಸ್. ಎನ್. ಕಮ್ಮಾರ್, ಶಿಕ್ಷಕ ಸಂಘಟನೆಯ ಉಪಾಧ್ಯಕ್ಷ ಕೆ. ಎಚ್. ಕೌಂದಲ್, ಕಾರ್ಯದರ್ಶಿ ಬಿ. ಬಿ. ಚಾಪಾಗಾಂವ್ಕರ್, ಬಿಜೆಪಿ ಮುಖಂಡ ಸದಾನಂದ ಹೊಸುರಕರ್, ತೋಪಿನಕಟ್ಟಿ ಮಹಾಲಕ್ಷ್ಮಿ ಗ್ರೂಪ್ನ ಪರಶುರಾಮ್ ಖಾಂಬ್ಲೆ, ಶಿಕ್ಷಕರಾದ ಸುರೇಶ್ ಭಾತ್ಕಾಂಡೆ, ಮಲ್ಲಪ್ಪ ವಾರ್ಣೋಳ್ಕರ್, ನಿವೃತ್ತ ಮುಖ್ಯಾಧ್ಯಾಪಕ ಎ. ಬಿ. ಮುರಗೋಡ್, ಮತ್ತು ಮ.ಏ.ಸಮಿತಿ ಮುಖಂಡ ಮರ್ಯಪ್ಪ ಪಾಟೀಲ್ ಉಪಸ್ಥಿತರಿದ್ದರು. ಎಲ್. ವಿ. ಗುರವ್ ಕಾರ್ಯಕ್ರಮ ಪರಿಚಯಿಸಿದರೆ, ಹಣಮಂತ್ ಕರಂಬಳ್ಕರ್ ವಂದನಾರ್ಪಣೆ ಮಾಡಿದರು.
