ಬೆಳಗಾವಿ ಜಿಲ್ಲೆಯ ಬೈಲಹೊಂಗಲ ತಾಲೂಕಿನ ದೊಡವಾಡ ಗ್ರಾಮದಲ್ಲಿ ಈ ಘಟನೆ ನಡೆದಿದ್ದು, ಫಕೀರಪ್ಪ ಕಿರಕಸಾಲಿ (38) ಕೊಲೆಯಾದ ದುರ್ದೈವಿ. ಮೃತ ಫಕೀರಪ್ಪ, ಆರೋಪಿ ಹಾಲಪ್ಪ ಜವಳಿ ಎಂಬಾತನಿಂದ ‘ನಿಮ್ಮ ಕುರಿಗಳನ್ನು ಕಾಯುತ್ತೇನೆ’ ಎಂದು ಹೇಳಿ ಮುಂಗಡವಾಗಿ 10 ಸಾವಿರ ರೂಪಾಯಿ ಹಣವನ್ನು ಪಡೆದುಕೊಂಡಿದ್ದ ಎನ್ನಲಾಗಿದೆ. ಆದರೆ ಹಣ ಪಡೆದ ನಂತರ ಫಕೀರಪ್ಪ ಕುರಿ ಕಾಯಲು ಹೋಗಿರಲಿಲ್ಲ. ಇದೇ ವಿಚಾರವಾಗಿ ಹಾಲಪ್ಪ ಹಾಗೂ ಫಕೀರಪ್ಪನ ಮಧ್ಯೆ ತೀವ್ರ ಮಾತಿನ ಚಕಮಕಿ ನಡೆದಿದೆ. ಈ ಜಗಳ ವಿಕೋಪಕ್ಕೆ ತಿರುಗಿ, ಕೋಪೋದ್ರಿಕ್ತಗೊಂಡ ಹಾಲಪ್ಪ ಮತ್ತು ಆತನ ಇಬ್ಬರು ಸಹಚರರು ಸೇರಿ ಫಕೀರಪ್ಪನ ಮೇಲೆ ಮುಗಿಬಿದ್ದಿದ್ದಾರೆ.

ಆರೋಪಿಗಳಾದ ಹಾಲಪ್ಪ ಜವಳಿ, ಮಂಜು ತಳವಾರ ಹಾಗೂ ಲಕ್ಕಪ್ಪ ಚೂನಪ್ಪಗೋಳ ಎಂಬುವವರು ದೊಡವಾಡ ಗ್ರಾಮದ ಹೊರವಲಯದ ಜಮೀನಿನ ಗದ್ದೆಯೊಂದರಲ್ಲಿ ಫಕೀರಪ್ಪನನ್ನು ತಡೆದು ನಿಲ್ಲಿಸಿ, ಮಾರಕಾಸ್ತ್ರಗಳಿಂದ ಮನಸೋಇಚ್ಛೆ ಕೊಚ್ಚಿ ಕ್ರೂರವಾಗಿ ಹತ್ಯೆ ಮಾಡಿ ಸ್ಥಳದಿಂದ ಪರಾರಿಯಾಗಿದ್ದರು. ಗದ್ದೆಯಲ್ಲಿ ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಶವವನ್ನು ಕಂಡು ಮೃತನ ಪತ್ನಿ ನೀಡಿದ ದೂರಿನನ್ವಯ ದೊಡವಾಡ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ತಕ್ಷಣವೇ ಕಾರ್ಯಪ್ರವೃತ್ತರಾದ ಪೊಲೀಸರು, ತನಿಖೆ ನಡೆಸಿ ತಲೆಮರೆಸಿಕೊಂಡಿದ್ದ ಮೂವರೂ ಆರೋಪಿಗಳನ್ನು ಕೇವಲ ಕೆಲವೇ ಗಂಟೆಗಳಲ್ಲಿ ಬಂಧಿಸಿ ಕಡ್ಡಾಯವಾಗಿ ಜೈಲಿಗಟ್ಟಿದ್ದಾರೆ.