ಸಾಮಾಜಿಕ ಹಾಗೂ ಸಾಂಸ್ಕೃತಿಕ ಕ್ಷೇತ್ರದಲ್ಲಿ ತನ್ನದೇ ಆದ ವಿಶಿಷ್ಟ ಗುರುತನ್ನು ಕಂಡುಕೊಂಡಿರುವ ಬೆಳಗಾವಿಯ ಸಮರ್ಥ ನಗರದ ‘ಎಸ್‌ಟಿಎಂ ಶ್ರೀ ನವರಾತ್ರಿ ಉತ್ಸವ ಮಂಡಳಿ’ ಈ ಬಾರಿಯ ನವರಾತ್ರಿ ಮಹೋತ್ಸವದಲ್ಲಿ ಅಪೂರ್ವ ಸಾಮಾಜಿಕ ಕಳಕಳಿ ಮೆರೆದಿದೆ. ಅನಾಥ ಮಕ್ಕಳ ಜೊತೆ ಹಬ್ಬದ ಸೌಹಾರ್ದತೆ ಹಂಚಿಕೊಳ್ಳುವ ಮೂಲಕ ಮಂಡಳಿಯು ಸಮಾಜಕ್ಕೆ ಮಾದರಿಯಾಗುವಂತೆ ಅರ್ಥಪೂರ್ಣವಾಗಿ ನವರಾತ್ರಿ ಆಚರಿಸಿದೆ.

ಬೆಳಗಾವಿಯ ಸಮರ್ಥ ನಗರದ ‘ಸಾರ್ವಜನಿಕ ಶ್ರೀ ನವರಾತ್ರಿ ಉತ್ಸವ ಮಂಡಳಿ ಎಸ್‌ಟಿಎಂ’ ವತಿಯಿಂದ ಶುಕ್ರವಾರ, ಅಕ್ಟೋಬರ್ 16 ರಂದು ರಾತ್ರಿ ‘ ಮಕ್ಕಳ ಧಾಮ’ ಆಶ್ರಮದ ಮಕ್ಕಳ ಹಸ್ತದಿಂದ ಶ್ರೀದೇವಿಗೆ ಮಹಾಮಂಗಳಾರತಿ ನೆರವೇರಿಸುವ ಮೂಲಕ ವಿಶೇಷವಾಗಿ ಪೂಜೆ ಸಲ್ಲಿಸಲಾಯಿತು. ಬೃಹತ್ ಹಾಗೂ ಭವ್ಯವಾದ ದೇವಿಯ ಮೂರ್ತಿಯನ್ನು ಕಂಡು ತನ್ಮಯರಾದ ಪುಟ್ಟ ಮಕ್ಕಳ ಮುಖದಲ್ಲಿ ಸಂತಸ ಮತ್ತು ಭಕ್ತಿ ಭಾವ ಎದ್ದು ಕಾಣುತ್ತಿತ್ತು. ಆರತಿಯಲ್ಲಿ ಭಾಗವಹಿಸಿದ ಪ್ರತಿಯೊಂದು ಮಗುವಿಗೂ ಪೂಜೆಯ ಗೌರವ ನೀಡಿ, ಆರತಿಯ ನಂತರ ಸಿಹಿ ತಿಂಡಿ ಹಾಗೂ ಆಹಾರ ಸಾಮಗ್ರಿಗಳನ್ನು ವಿತರಿಸಿ ಸನ್ಮಾನಿಸಲಾಯಿತು. ಈ ಸಂದರ್ಭದಲ್ಲಿ ಮಾತನಾಡಿದ ‘ಮಕ್ಕಳ ಧಾಮ’ದ ಶಿಕ್ಷಕಿಯರು, “ಬೆಳಗಾವಿಯಲ್ಲಿ ನಮಗೆ ಯಾವುದೇ ಸಾರ್ವಜನಿಕ ಕಾರ್ಯಕ್ರಮಕ್ಕೆ ಆಹ್ವಾನ ನೀಡುವುದೆಂದರೆ ಅದು ಕೇವಲ ಸಮರ್ಥ ನಗರದ ನಿವಾಸಿಗಳು ಮಾತ್ರ” ಎಂದು ಭಾವುಕರಾಗಿ ನುಡಿದು ಎಸ್‌ಟಿಎಂ ಮಂಡಳಿಗೆ ಕೃತಜ್ಞತೆ ಸಲ್ಲಿಸಿದರು. ಈ ಪುಟ್ಟ ಮಕ್ಕಳ ಮುಖದಲ್ಲಿದ್ದ ನಗು ಹಾಗೂ ಆನಂದವನ್ನು ಕಂಡು ಸ್ಥಳೀಯರಲ್ಲೂ ಅಪಾರ ಸಂತಸ ಮೂಡಿತು.