ಬೆಳಗಾವಿ ನಗರದ ಹಳೆಯ ಮಾರ್ಕೇಟ್ ಪೊಲೀಸ್ ಠಾಣೆ ಪ್ರದೇಶದಲ್ಲಿ ‘ಹೆರಾಯಿನ್’ ಮಾರಾಟ ಮಾಡುತ್ತಿದ್ದ ಮೂವರನ್ನು ಪೊಲೀಸರು ರೆಡ್‌ಹ್ಯಾಂಡ್ ಆಗಿ ಬಂಧಿಸಿದ್ದಾರೆ.
ಸತ್ಯಂ ಸುಹಾಸ್ ಹುದ್ದಾರ್, ಇರ್ಷಾದ್ ಅಹ್ಮದ್ ಸಲಾವುದ್ದೀನ್ ತಹಶೀಲ್ದಾರ್ ಮತ್ತು ಸಿದ್ಧಾರ್ಥ್ ದತ್ತಾ ಕದಮ್ ಬಂಧಿತ ಆರೋಪಿಗಳಾಗಿದ್ದಾರೆ. ಮಾರ್ಕೆಟ್ ಪೊಲೀಸ್ ಠಾಣೆಯ ಉಪನಿರೀಕ್ಷಕರಾದ (ಪಿಎಸ್‌ಐ) ಮಣಿಕಂಠ ಪೂಜಾರಿ ಮತ್ತು ಅವರ ತಂಡ ಈ ಕಾರ್ಯಾಚರಣೆ ನಡೆಸಿದ್ದು, ಆರೋಪಿಗಳಿಂದ ಮಾದಕ ವಸ್ತು ಹಾಗೂ ದ್ವಿಚಕ್ರ ವಾಹನವನ್ನು ವಶಪಡಿಸಿಕೊಳ್ಳಲಾಗಿದೆ.
ಮತ್ತೊಂದು ಕಾರ್ಯಾಚರಣೆಯಲ್ಲಿ, ರೂಪಂ ಟಾಕೀಸ್ ಪ್ರದೇಶದಲ್ಲಿ ಸೃಜಲ್ ಕೃಷ್ಣನಾಥ್ ಪಾಟೀಲ್ ಎಂಬ ಯುವಕನನ್ನು ವಶಕ್ಕೆ ಪಡೆಯಲಾಗಿದ್ದು, ಆತನ ಇಬ್ಬರು ಸಹಚರರಾದ ಕೃಷ್ಣಾ ಘೋಡ್ಸೆ ಮತ್ತು ವಿಜಯ್ ಕವಳೇಕರ್ ತಲೆಮರೆಸಿಕೊಂಡಿದ್ದಾರೆ. ಈ ಆರೋಪಿಗಳ ವಿರುದ್ಧ ಮಾದಕ ವಸ್ತು ನಿಯಂತ್ರಣ ಕಾಯ್ದೆಯಡಿ (NDPS) ಪ್ರಕರಣ ದಾಖಲಿಸಲಾಗಿದೆ.
ಇನ್ನೊಂದು ಪ್ರತ್ಯೇಕ ಕಾರ್ಯಾಚರಣೆಯಲ್ಲಿ, ಜಾಂಬೋಟಿ ರಸ್ತೆಯ ಮಚ್ಛೆ ಗ್ರಾಮದ ವ್ಯಾಪ್ತಿಯಲ್ಲಿ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿದ್ದ ಸಂದೇಶ್ ಈರಪ್ಪ ನಾಯಕ್ ಎಂಬಾತನನ್ನು ಬೆಳಗಾವಿ ಗ್ರಾಮೀಣ ಪೊಲೀಸರು ಬಂಧಿಸಿದ್ದಾರೆ.
ಈ ಯಶಸ್ವಿ ಕಾರ್ಯಾಚರಣೆಗಳಿಗಾಗಿ ಬೆಳಗಾವಿ ನಗರ ಪೊಲೀಸ್ ಆಯುಕ್ತರು (ಕಮಿಷನರ್) ಮತ್ತು ಉಪ ಆಯುಕ್ತರು (ಡಿಸಿಪಿ) ಸಂಬಂಧಪಟ್ಟ ಪೊಲೀಸ್ ತಂಡಗಳನ್ನು ಶ್ಲಾಘಿಸಿದ್ದಾರೆ.