ಬೆಳಗಾವಿ ಜಿಲ್ಲೆಯ ರಾಜಹಂಸಗಡದ ಗರ್ಲಗುಂಜಿ ಕ್ರಾಸ್ ನಂದಿಹಳ್ಳಿ ರಸ್ತೆಯಲ್ಲಿ ಇಂದು ಮಧ್ಯಾಹ್ನ ಸುಮಾರು 3 ಗಂಟೆಗೆ ಜಾನುವಾರುಗಳ ಮೇವಿಗೆ ಆಕಸ್ಮಿಕವಾಗಿ ಬೆಂಕಿ ತಗುಲಿ ಭೀಕರ ಅಗ್ನಿ ಅವಘಡ ಸಂಭವಿಸಿದೆ.

ರೈತ ಪ್ರಕಾಶ್ ರಘುನಾಥ್ ಥೋರವಾತ್ ಅವರಿಗೆ ಸೇರಿದ, ಕಚ್ಚಾ ಭತ್ತದ ಎರಡು ಬಣವೆಗಳು, ಕಡಲೆಕಾಯಿ ಸಿಪ್ಪೆಯ ಎರಡು ಬಣವೆಗಳು ಮತ್ತು ಕರಡ ಒಂದು ಬಣವೆ ಸೇರಿದಂತೆ ಒಟ್ಟು ಐದು ಜಾನುವಾರುಗಳ ಮೇವಿನ ಬಣವೆಗಳು ಬೆಂಕಿಗೆ ಆಹುತಿಯಾಗಿವೆ. ಬೆಂಕಿಯ ಕೆನ್ನಾಲಿಗೆಗೆ ಸುಮಾರು 30 ಚೀಲಗಳಷ್ಟು ಭತ್ತ ನಾಶವಾಗಿದ್ದು, ಈ ಘಟನೆಯಿಂದ ರೈತ ಪ್ರಕಾಶ್ ಥೋರವಾತ್ ಅವರಿಗೆ ಸುಮಾರು ಒಂದೂವರೆ ಲಕ್ಷ ರೂಪಾಯಿಗಳ ನಷ್ಟ ಸಂಭವಿಸಿದೆ. ಮೇವು ಸಂಪೂರ್ಣವಾಗಿ ಸುಟ್ಟು ಹೋಗಿರುವುದರಿಂದ, ಮನೆಯಲ್ಲಿರುವ ಮೂರು ಎಮ್ಮೆಗಳು ಸೇರಿದಂತೆ ಜಾನುವಾರುಗಳಿಗೆ ತೀವ್ರ ಮೇವಿನ ಕೊರತೆ ಉಂಟಾಗಿ ಉಪವಾಸದ ಪರಿಸ್ಥಿತಿ ಎದುರಾಗಿದೆ. ಬೆಂಕಿ ಅವಘಡದಿಂದ ನಷ್ಟಕ್ಕೊಳಗಾದ ರೈತರಿಗೆ ಸಾಮಾಜಿಕ ಬದ್ಧತೆಯ ನೆಲೆಯಲ್ಲಿ ಸರ್ಕಾರ ಸೂಕ್ತ ಪರಿಹಾರ ನೀಡಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.

ರಸ್ತೆಯಲ್ಲಿ ಹೋಗುತ್ತಿದ್ದ ವಾಹನ ಚಾಲಕರು ಮತ್ತು ಅಕ್ಕಪಕ್ಕದ ನಿವಾಸಿಗಳ ಸಮಯೋಚಿತ ಎಚ್ಚರಿಕೆ ಮತ್ತು ಸಹಕಾರದಿಂದಾಗಿ, ಪಕ್ಕದಲ್ಲಿದ್ದ ಉಳಿದ ಭತ್ತದ ಹುಲ್ಲಿನ ಬಣವೆಗಳಿಗೆ ಬೆಂಕಿ ಹರಡದಂತೆ ತಡೆಯಲು ಸಾಧ್ಯವಾಗಿದೆ.