• ಛತ್ರಪತಿ ಶಿವಾಜಿ ಮಹಾರಾಜರ ಜೀವನ ದರ್ಶನ
• ದೀಡನೂರಕ್ಕೂ ಹೆಚ್ಚು ಸಿಬ್ಬಂದಿಗೆ ಸಿನಿಮಾ ಪ್ರದರ್ಶನ
• ನರ್ತಕಿ-ಸ್ವರೂಪ ಚಿತ್ರಮಂದಿರಕ್ಕೆ ಭೇಟಿ ನೀಡಿದ ತಂಡ
• ಮಹಾರಾಜರ ಆದರ್ಶಗಳನ್ನು ಅಳವಡಿಸಿಕೊಳ್ಳಲು ಕರೆ
ಛತ್ರಪತಿ ಶಿವಾಜಿ ಮಹಾರಾಜರಂತಹ ಮಹಾನ್ ರಾಷ್ಟ್ರ ಪುರುಷರ ಜೀವನಾದರ್ಶಗಳನ್ನು ಉದ್ಯೋಗಿಗಳಿಗೆ ಪರಿಚಯಿಸಲು ಬೆಳಗಾವಿಯ ಹೆಸರಾಂತ ಉದ್ಯಮಿ ಶಿರಿಶ್ ಗೋಗಟೆ ಅವರು ವಿಶೇಷ ಕಾರ್ಯಕ್ರಮ ಹಮ್ಮಿಕೊಂಡಿದ್ದರು. ಗೋಗಟೆ ಗ್ರೂಪ್ ಆಫ್ ಇಂಡಸ್ಟ್ರೀಸ್‌ನ ಸುಮಾರು 150ಕ್ಕೂ ಹೆಚ್ಚು ಸಿಬ್ಬಂದಿಗೆ ‘ರಾಜಾ ಶಿವಾಜಿ’ ಚಲನಚಿತ್ರವನ್ನು ವೀಕ್ಷಿಸುವ ಅವಕಾಶವನ್ನು ಅವರು ಕಲ್ಪಿಸಿಕೊಟ್ಟಿದ್ದಾರೆ.
ಬೆಳಗಾವಿಯ ನರ್ತಕಿ-ಸ್ವರೂಪ ಚಿತ್ರಮಂದಿರಕ್ಕೆ ತಮ್ಮ ಸಂಸ್ಥೆಯ ಸಿಬ್ಬಂದಿಯನ್ನು ಕರೆತಂದ ಉದ್ಯಮಿ ಶಿರಿಶ್ ಗೋಗಟೆ ಅವರು, ಆರಂಭದಲ್ಲಿ ಶಿವಾಜಿ ಮಹಾರಾಜರು ಹಾಗೂ ಲೋಕಮಾನ್ಯ ತಿಲಕರ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿದರು. ಈ ವೇಳೆ ಮಾತನಾಡಿದ ಅವರು, “ಶಿವಾಜಿ ಮಹಾರಾಜರಂತಹ ರಾಜರು ಮತ್ತೆ ಜನಿಸಲು ಸಾಧ್ಯವಿಲ್ಲ. ಅವರ ಜೀವನದ ಕೆಲವೇ ಕೆಲವು ತತ್ವಗಳನ್ನು ನಾವು ಅಳವಡಿಸಿಕೊಂಡರೂ ನಮ್ಮ ಜೀವನ ಸಮೃದ್ಧವಾಗುತ್ತದೆ. ಈ ಉದ್ದೇಶದಿಂದಲೇ ಸಿಬ್ಬಂದಿಗೆ ಈ ಚಿತ್ರವನ್ನು ತೋರಿಸಲಾಗುತ್ತಿದೆ,” ಎಂದು ಹೇಳಿದರು.
ಈ ಸಂದರ್ಭದಲ್ಲಿ ನರ್ತಕಿ-ಸ್ವರೂಪ ಚಿತ್ರಮಂದಿರದ ನಿರ್ದೇಶಕರಾದ ಅವಿನಾಶ್ ಪೋತದಾರ್ ಅವರು ಗೋಗಟೆ ಗ್ರೂಪ್ ಸಿಬ್ಬಂದಿಯನ್ನು ಸ್ವಾಗತಿಸಿದರು. ‘ರಾಜಾ ಶಿವಾಜಿ’ ಚಿತ್ರವು ಮೊದಲ ದಿನದಿಂದಲೇ ಹೌಸ್‌ಫುಲ್ ಪ್ರದರ್ಶನ ಕಾಣುತ್ತಿದೆ ಎಂದು ಪೋತದಾರ್ ಮಾಹಿತಿ ನೀಡಿದರು. ಸಿನಿಮಾ ವೀಕ್ಷಿಸಿದ ಸಿಬ್ಬಂದಿ ವರ್ಗವು ಮಹಾರಾಜರ ಶೌರ್ಯಗಾಥೆಯನ್ನು ಕಂಡು ಅತ್ಯಂತ ತೃಪ್ತಿ ಮತ್ತು ಹೆಮ್ಮೆ ವ್ಯಕ್ತಪಡಿಸಿದರು. ಕಾರ್ಯಕ್ರಮದಲ್ಲಿ ಶಿರಿಶ್ ಗೋಗಟೆ, ಅವಿನಾಶ್ ಪೋತದಾರ್ ಹಾಗೂ ಗೋಗಟೆ ಇಂಡಸ್ಟ್ರೀಸ್‌ನ ನೂರಾರು ಉದ್ಯೋಗಿಗಳು ಭಾಗಿಯಾಗಿದ್ದರು.