ಬೆಳಗಾವಿ ತಾಲೂಕಿನ ಸುಳೇಭಾವಿಯಲ್ಲಿ ಆಯೋಜಿಸಲಾಗಿದ್ದ ಪ್ರಥಮ ‘ಸುಳೇಭಾವಿ ಶ್ರೀ ಟಾಪ್-10’ ಗ್ರಾಮೀಣ ತಾಲೂಕು ಮಟ್ಟದ ದೇಹದಾರ್ಢ್ಯ ಸ್ಪರ್ಧೆಯಲ್ಲಿ ಸುನಿಲ್ ಭಾತಕಾಂಡೆ ಅವರು ‘ಸುಳೇಭಾವಿ ಶ್ರೀ’ ಪುರಸ್ಕಾರವನ್ನು ಪಡೆದರೆ, ಶ್ರೀಶಿವ ಮೊದಗೇಕರ್ ಅವರು ‘ಕಲಮೇಶ್ವರ ಶ್ರೀ’ ಪುರಸ್ಕಾರವನ್ನು ತಮ್ಮದಾಗಿಸಿಕೊಂಡರು.

ಭೈರೋಬಾ ಫಿಟ್‌ನೆಸ್ ವತಿಯಿಂದ ಹಮ್ಮಿಕೊಳ್ಳಲಾಗಿದ್ದ ಈ ಸ್ಪರ್ಧೆಯ ಜಿಮ್ ವಿಭಾಗದಲ್ಲಿ ಜೀವನ್ ವಿಜಾಪುರಿ ಅವರು ಪ್ರಥಮ ಸ್ಥಾನ ಪಡೆದು ‘ಭೈರೋಬಾ ಫಿಟ್‌ನೆಸ್ ಶ್ರೀ’ ಪುರಸ್ಕಾರಕ್ಕೆ ಭಾಜನರಾದರು. ಸುಳೇಭಾವಿಯ ಕಲಮೇಶ್ವರ ದೇವಸ್ಥಾನದ ಆವರಣದಲ್ಲಿ ಈ ಸ್ಪರ್ಧೆಯು ಅತ್ಯಂತ ಉತ್ಸಾಹದಿಂದ ಜರುಗಿತು.
ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿಗಳಾಗಿ ಮಹಾಲಕ್ಷ್ಮೀ ದೇವಸ್ಥಾನದ ಟ್ರಸ್ಟಿಗಳಾದ ದೇವಣ್ಣ ಬಾಂಗೆನ್ನವರ, ಮಾರುತಿ ಕಾಲಬರ, ಪರಶರಾಮ ಕಬಾಲಾಪುರ ಹಾಗೂ ದಯಮಣ್ಣ ಮುರಾರಿ ಅವರು ಆಗಮಿಸಿದ್ದರು. ಸಿದರಾಯ ಕುಕಡೋಳಿ ಮತ್ತು ಗಂಗಪ್ಪ ಕುಕಡೋಳಿ ಅವರು ಸ್ಪರ್ಧೆಯನ್ನು ಯಶಸ್ವಿಯಾಗಿ ಸಂಘಟಿಸಿದ್ದರು. ಅಪ್ಪಯ್ಯ ಶಿಂದೆ ಅವರು ಸ್ಪರ್ಧೆಯ ಪ್ರಾಯೋಜಕತ್ವ ವಹಿಸಿದ್ದರು.

ವಿಜೇತ ಕ್ರೀಡಾಪಟುಗಳಿಗೆ ಕಲ್ಲಪ್ಪ ಚೌಗುಲೆ, ಸಚಿನ್ ಮಾಂಡು, ಕಾಂತು ಲಖನಗೌಡ, ಗಂಗಾಯ ಪೂಜಾರಿ, ನಾಗೇಶ ಚೌಗುಲೆ, ನಾಗೇಂದ್ರ ಮಾಂಡು, ರವಿ ಮಿಸಾಳೆ, ಮಾರುತಿ ಬಾಂಗೆನ್ನವರ, ವಿಶಾಲ ಪಾಟೀಲ, ಗೌರಂಗ ಗೆಂಜಿ, ಹರೀಶ ಮೊಳಗಿ, ಸುರೇಶ ಮಾರಿಹಾಳತ ಹಾಗೂ ಮಲ್ಲಪ್ಪ ಬಾಂಗೆನ್ನವರ ಅವರ ಹಸ್ತದಿಂದ ಬಹುಮಾನ ವಿತರಿಸಲಾಯಿತು. ವಿಜೇತರಿಗೆ ಆಕರ್ಷಕ ಟ್ರೋಫಿ ಮತ್ತು ಸಪ್ಲಿಮೆಂಟ್ ಗಿಫ್ಟ್ ಹ್ಯಾಂಪರ್‌ಗಳನ್ನು ನೀಡಿ ಗೌರವಿಸಲಾಯಿತು.ತಜ್ಞ ತೀರ್ಪುಗಾರರ ಮಂಡಳಿಯು ಸ್ಪರ್ಧೆಯ ತಾಂತ್ರಿಕ ಕಾರ್ಯಗಳನ್ನು ನಿರ್ವಹಿಸಿತು. ಇದರಲ್ಲಿ ಅಜಿತ್ ಸಿದನಾವರ, ಎಂ. ಗಂಗಾಧರ, ಹೇಮಂತ ಹವಾಲ, ಅನಂತ ಲಂಗರಕಾಂಡೆ, ನೂರ್ ಮುಲ್ಲಾ, ಸುನಿಲ್ ಪವಾರ್, ಆಕಾಶ ಹುಲಿಯೂರ ಮತ್ತು ಗಜಾನನ ಹಂಗಿರಗೇಕರ ಅವರು ಕಾರ್ಯನಿರ್ವಹಿಸಿದರು.