ಉಗಾರದಲ್ಲಿ ಸಂಭಾಜಿ ಮಹಾರಾಜರ ಬಲಿದಾನ ದಿನ
• ಸಮಾಜ ಬಾಂಧವರಿಂದ ಭವ್ಯ ಮೌನ ಮೆರವಣಿಗೆ
• ಧರ್ಮ ರಕ್ಷಣೆಗಾಗಿ ಮಹಾರಾಜರ ಪರಮೋಚ್ಚ ತ್ಯಾಗ
• 337ನೇ ಬಲಿದಾನ ದಿನದ ಸವಿನೆನಪಿನ ಕಾರ್ಯಕ್ರಮ

ಕಾಗವಾಡ ತಾಲೂಕಿನ ಉಗಾರ್ ಖುರ್ದ್ ಪಟ್ಟಣದ ಮರಾಠಾ ಸಮಾಜದ ಬಾಂಧವರು ಮತ್ತು ‘ಜಿಜಾವುಚ್ಯಾ ಲೇಕಿ’ ಸಂಘಟನೆಯ ಮಹಿಳಾ ಸದಸ್ಯರು ಒಗ್ಗೂಡಿ ಛತ್ರಪತಿ ಸಂಭಾಜಿ ಮಹಾರಾಜರ ಬಲಿದಾನ ದಿನದ ಅಂಗವಾಗಿ ಪುಣ್ಯ ಸ್ಮರಣೆ ಕಾರ್ಯಕ್ರಮವನ್ನು ಆಯೋಜಿಸಿದ್ದರು.
ಬುಧವಾರ ಸಂಜೆ ಉಗಾರ್ ಪಟ್ಟಣದ ಛತ್ರಪತಿ ಶಿವಾಜಿ ಮಹಾರಾಜರ ಪುತ್ಥಳಿಗೆ ಪೂಜೆ ಸಲ್ಲಿಸುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಲಾಯಿತು. ಅಲ್ಲಿಂದ ಐನಾಪುರ ರಸ್ತೆಯ ಡಾ. ಜೋಗ ವೃತ್ತದವರೆಗೆ ಮೌನ ಮೆರವಣಿಗೆ ನಡೆಸಲಾಯಿತು. ವೃತ್ತದಲ್ಲಿ ಸಂಭಾಜಿ ಮಹಾರಾಜರ ಬಲಿದಾನ ದಿನದ ವಿಧಿವಿಧಾನಗಳನ್ನು ಪೂರೈಸಿ, ಎಲ್ಲರೂ ದೇಶಭಕ್ತಿಯ ಪ್ರಮಾಣ ವಚನ ಸ್ವೀಕರಿಸಿದರು.
ಮರಾಠಾ ಸಮಾಜದ ಹಿರಿಯರಾದ ಗಜಾನನ್ ಕಾಣೆ ಮತ್ತು ಸುಹಾಸ್ ಶಿಂಧೆ ಮಾತನಾಡಿ, “ಮರಾಠಾ ಸಾಮ್ರಾಜ್ಯದ ದ್ವಿತೀಯ ಛತ್ರಪತಿಯಾಗಿದ್ದ ಸಂಭಾಜಿ ಮಹಾರಾಜರು ಅಪಾರ ಶೌರ್ಯ, ಧರ್ಮನಿಷ್ಠೆ ಹಾಗೂ ದೇಶಭಕ್ತಿಯ ಪ್ರತೀಕ. ಶಿವಾಜಿ ಮಹಾರಾಜರ ಹಿರಿಯ ಪುತ್ರರಾದ ಇವರು 1681ರಲ್ಲಿ ಸಿಂಹಾಸನಾರೂಢರಾದರು. ಮುಘಲ್ ಸಾಮ್ರಾಟ ಔರಂಗಜೇಬನ ವಿರುದ್ಧ ನಿರಂತರ ಹೋರಾಡಿ ಮರಾಠಾ ಸಾಮ್ರಾಜ್ಯದ ಸ್ವಾತಂತ್ರ್ಯವನ್ನು ಕಾಪಾಡಿದರು,” ಎಂದು ಸ್ಮರಿಸಿದರು. 1689ರಲ್ಲಿ ಮುಘಲ್ ಸೇನೆಯಿಂದ ಬಂಧನಕ್ಕೊಳಗಾದ ಸಂಭಾಜಿ ಮಹಾರಾಜರನ್ನು ಮತಾಂತರಗೊಳ್ಳುವಂತೆ ಒತ್ತಾಯಿಸಲಾಯಿತು. ಆದರೆ ಅವರು ತಮ್ಮ ಧರ್ಮದ ಮೇಲಿನ ಅಚಲ ನಂಬಿಕೆಯಿಂದ ಅದನ್ನು ನಿರಾಕರಿಸಿದರು. ಈ ಕಾರಣಕ್ಕಾಗಿ 1689ರ ಮಾರ್ಚ್ 11ರಂದು ಅವರನ್ನು ಕ್ರೂರವಾಗಿ ಹತ್ಯೆ ಮಾಡಲಾಯಿತು. ಅವರ ಈ ತ್ಯಾಗವು ಧರ್ಮರಕ್ಷಣೆ ಮತ್ತು ಸ್ವಾಭಿಮಾನದ ಪರಮೋಚ್ಚ ಬಲಿದಾನವಾಗಿದೆ.

2026ರಲ್ಲಿ ಸಂಭಾಜಿ ಮಹಾರಾಜರ 337ನೇ ಬಲಿದಾನ ದಿನವನ್ನು ದೇಶಾದ್ಯಂತ ಗೌರವದಿಂದ ಆಚರಿಸಲಾಗುತ್ತಿದ್ದು, ಅದರ ಅಂಗವಾಗಿ ಉಗಾರದಲ್ಲಿ ಕಳೆದ 27 ದಿನಗಳಿಂದ ಸತತವಾಗಿ ಪ್ರಾರ್ಥನಾ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿತ್ತು ಎಂದು ಸಂಘಟಕರು ತಿಳಿಸಿದರು.

ಈ ಸಂದರ್ಭದಲ್ಲಿ ಮರಾಠಾ ಸಮಾಜದ ಅಧ್ಯಕ್ಷ ವಿಶ್ವನಾಥ್ ಶಿರಸಾಟ್, ಉಪಾಧ್ಯಕ್ಷ ವಿಜಯ ಥೊರುಷೆ, ವಿಕ್ರಂ ಭೋಸಲೆ, ಅಮರ ಜಗತಾಪ್, ಪೋಪಟ ಜಗತಾಪ ಹಾಗೂ ಮಹಿಳಾ ಸದಸ್ಯರಾದ ಕಾಂಚನ್ ನಿಂಬಾಳಕರ್, ನಿರ್ಮಲಾ ಡೆರೆ, ರಾಜನಂದಿನಿ ಘಾರಗೆ, ಕವಿತಾ ಸಲಗರೆ, ಪ್ರೀತಿ ಪಾಚಕಟ್ಟೆ ಸೇರಿದಂತೆ ನೂರಾರು ಸಮಾಜ ಬಾಂಧವರು ಮತ್ತು ವಿದ್ಯಾರ್ಥಿಗಳು ಪಾಲ್ಗೊಂಡಿದ್ದರು.