ಇಂದಿನ ಸ್ಪರ್ಧಾತ್ಮಕ ಯುಗದಲ್ಲಿ ಮಾನವ ಸಂಪನ್ಮೂಲ ವೃತ್ತಿಪರರಾಗುವುದು ಅಂದುಕೊಂಡಷ್ಟು ಸುಲಭವಲ್ಲ. ಹೆಚ್ಆರ್ ಎಂದರೆ ಕೇವಲ ಜನರೊಂದಿಗೆ ವ್ಯವಹರಿಸುವುದು ಎಂಬ ನಂಬಿಕೆಯನ್ನು ಸುಳ್ಳು ಮಾಡಿ, ದತ್ತಾಂಶ ಮತ್ತು ವ್ಯವಹಾರದ ಜ್ಞಾನ ಎಷ್ಟು ಮುಖ್ಯ ಎಂಬುದರ ಕುರಿತು ಬೆಳಗಾವಿಯಲ್ಲಿ ಮಹತ್ವದ ಉಪನ್ಯಾಸ ನಡೆಯಿತು.
ಬೆಳಗಾವಿಯ ಎಕ್ವಸ್ ಲಿಮಿಟೆಡ್ನ ಬಿಸಿನೆಸ್ ಎಚ್.ಆರ್ ಟ್ಯಾಲೆಂಟ್ ಅಕ್ವಿಸಿಷನ್ ಲೀಡ್ ಶ್ರಾವಣಿ ಕುಲಕರ್ಣಿ ಅವರು ಇತ್ತೀಚೆಗೆ ಎಂಬಿಎ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ “ಎಚ್.ಆರ್ ವೃತ್ತಿಪರರಾಗಲು ಬೇಕಾದ ಅರ್ಹತೆಗಳು” ಎಂಬ ವಿಷಯದ ಕುರಿತು ವಿಶೇಷ ಉಪನ್ಯಾಸ ನೀಡಿದರು. ಹೆಚ್ಆರ್ ಎಂದರೆ ಕೇವಲ ಜನರ ನಡುವಿನ ಸಂಬಂಧವಲ್ಲ, ಅದು ಅಂಕಿ-ಅಂಶಗಳು, ದತ್ತಾಂಶಗಳು ಮತ್ತು ವ್ಯವಹಾರದ ಸೂಕ್ಷ್ಮತೆಯನ್ನು ಪ್ರೀತಿಸುವ ವೃತ್ತಿಯಾಗಿದೆ ಎಂದು ಅವರು ವಿದ್ಯಾರ್ಥಿಗಳಿಗೆ ಮನವರಿಕೆ ಮಾಡಿಕೊಟ್ಟರು. ಒಬ್ಬ ಯಶಸ್ವಿ ಹೆಚ್ಆರ್ ವೃತ್ತಿಪರನಿಗೆ ಪ್ರಾಮಾಣಿಕತೆ, ಸಹಾನುಭೂತಿ ಮಾತ್ರವಲ್ಲದೆ, ವಿಶ್ಲೇಷಣಾತ್ಮಕ ಚಿಂತನೆ ಮತ್ತು ಬಲವಾದ ಸಂವಹನ ಕೌಶಲ ಅತ್ಯಗತ್ಯ ಎಂದು ಅವರು ಪ್ರತಿಪಾದಿಸಿದರು.
ಬದಲಾಗುತ್ತಿರುವ ಕಾರ್ಪೊರೇಟ್ ಜಗತ್ತಿನಲ್ಲಿ ಹೆಚ್ಆರ್ ನಿರ್ಧಾರಗಳು ಹಣಕಾಸಿನ ಮೇಲೆ ಬೀರುವ ಪ್ರಭಾವ ಮತ್ತು ಕಾಂಪ್ಲೈಯನ್ಸ್ (ಅನುಸರಣೆ) ಮಹತ್ವವನ್ನು ಶ್ರಾವಣಿ ಅವರು ವಿವರಿಸಿದರು. ವಿದ್ಯಾರ್ಥಿಗಳು ಕೇವಲ ಪುಸ್ತಕದ ಜ್ಞಾನಕ್ಕೆ ಸೀಮಿತವಾಗದೆ, ಇಂಟರ್ನ್ಶಿಪ್ ಹಾಗೂ ಇಂಡಸ್ಟ್ರಿ ಅಸೈನ್ಮೆಂಟ್ಗಳ ಮೂಲಕ ಪ್ರಾಯೋಗಿಕ ಅನುಭವ ಪಡೆಯಬೇಕು ಎಂದು ಕರೆ ನೀಡಿದರು. ಡಾ. ಶೈಲಜಾ ಹಿರೇಮಠ ಈ ಕಾರ್ಯಕ್ರಮವನ್ನು ಸಂಘಟಿಸಿದ್ದರು. ಡಾ. ಆರಿಫ್ ಶೇಖ್ ಅವರು ಅತಿಥಿಗಳನ್ನು ಸ್ವಾಗತಿಸಿ, ವಿದ್ಯಾರ್ಥಿಗಳು ಪ್ರಾಯೋಗಿಕ ಅಂಶಗಳನ್ನು ಕಲಿಯುವಂತೆ ಪ್ರೋತ್ಸಾಹಿಸಿದರು. ಈ ಸಂವಾದಾತ್ಮಕ ಸೆಷನ್ ಭವಿಷ್ಯದ ಹೆಚ್ಆರ್ ವೃತ್ತಿಪರರಿಗೆ ಸ್ಪಷ್ಟ ಮಾರ್ಗಸೂಚಿಯನ್ನು ಒದಗಿಸಿತು.
