ಸಾಧನೆಗೆ ವಯಸ್ಸು ಮತ್ತು ಗಾತ್ರ ಎರಡೂ ಅಡ್ಡಿಯಲ್ಲ ಎಂಬುದನ್ನು ಬೆಳಗಾವಿ ಮೂಲದ ಸ್ವಾತಿ ಕುರಾಡೆ ಸಾಬೀತುಪಡಿಸಿದ್ದಾರೆ. ಕಣ್ಣಿಗೆ ಸರಿಯಾಗಿ ಕಾಣಿಸದಷ್ಟು ಚಿಕ್ಕ ಗಾತ್ರದ ಶಿವಾಜಿ ಮಹಾರಾಜರ ಚಿತ್ರವನ್ನು ಕೇವಲ ಎರಡೇ ನಿಮಿಷದೊಳಗೆ ರಚಿಸುವ ಮೂಲಕ ಈ ಯುವತಿ ಇದೀಗ ಇಡೀ ಏಷ್ಯಾ ಖಂಡದ ಗಮನ ಸೆಳೆದಿದ್ದಾರೆ.

ಕರ್ನಾಟಕದ ಮಣ್ಣಿನ ಪ್ರತಿಭೆಯೊಂದು ಅಂತರಾಷ್ಟ್ರೀಯ ಮಟ್ಟದಲ್ಲಿ ಮಿಂಚಿದೆ. ಬೆಳಗಾವಿ ಮೂಲದ ಸ್ವಾತಿ ಶಶಿಕಾಂತ್ ಕುರಾಡೆ ಅವರು ಅತೀ ಕಡಿಮೆ ಸಮಯದಲ್ಲಿ ಛತ್ರಪತಿ ಶಿವಾಜಿ ಮಹಾರಾಜರ ಸೂಕ್ಷ್ಮ ಚಿತ್ರವನ್ನು ಬಿಡಿಸುವ ಮೂಲಕ ‘ಏಷ್ಯಾ ಬುಕ್ ಆಫ್ ರೆಕಾರ್ಡ್ಸ್’ನಲ್ಲಿ ‘ಗ್ರ್ಯಾಂಡ್ ಮಾಸ್ಟರ್’ ಪದವಿಗೆ ಭಾಜನರಾಗಿದ್ದಾರೆ. ಕೇವಲ 1 ಸೆಂಟಿಮೀಟರ್ ಉದ್ದ ಹಾಗೂ 1 ಸೆಂಟಿಮೀಟರ್ ಅಗಲದ ಪುಟ್ಟ ಕಾಗದದ ಮೇಲೆ, ಮೆಹಂದಿ ಕೋನ್

ಬಳಸಿಕೊಂಡು ಶಿವಾಜಿ ಮಹಾರಾಜರ ಸುಂದರ ಚಿತ್ರವನ್ನು ಬಿಡಿಸಿರುವುದು ಈ ಸಾಧನೆಯ ವಿಶೇಷ.ಸ್ವಾತಿ ಅವರು ಈ ಅದ್ಭುತ ಕಲಾಕೃತಿಯನ್ನು ಕೇವಲ 1 ನಿಮಿಷ 51 ಸೆಕೆಂಡ್‌ಗಳಲ್ಲಿ ಪೂರ್ಣಗೊಳಿಸುವ ಮೂಲಕ ಎಲ್ಲರನ್ನೂ ಬೆರಗುಗೊಳಿಸಿದ್ದಾರೆ. ನವೆಂಬರ್ 17, 2025 ರಂದು ಅವರ ಸಾಧನೆ ಅಧಿಕೃತವಾಗಿ ದೃಢಪಟ್ಟಿದ್ದು, ಡಿಸೆಂಬರ್ 11 ರಂದು ವಿಶ್ವದಾಖಲೆಯ ಪ್ರಮಾಣಪತ್ರ ಲಭಿಸಿದೆ. ಈ ಮೂಲಕ ಅತ್ಯಂತ ವೇಗವಾಗಿ ಮೆಹಂದಿ ಕಲೆಯಲ್ಲಿ ಸೂಕ್ಷ್ಮ ಚಿತ್ರ ಬಿಡಿಸಿದ ಕೀರ್ತಿ ಈಗ ಕರ್ನಾಟಕದ ಈ ಯುವತಿಯ ಪಾಲಾಗಿದೆ. ಸ್ವಾತಿ ಅವರ ಈ ಅನನ್ಯ ಕಲಾ ನೈಪುಣ್ಯಕ್ಕೆ ಈಗ ಎಲ್ಲೆಡೆ ಶ್ಲಾಘನೆ ವ್ಯಕ್ತವಾಗುತ್ತಿದೆ.