• ಮರಾಠಾ ಮಂಡಲದಲ್ಲಿ ವಾಯುಸೇನೆ ಅಧಿಕಾರಿಗಳ ಭೇಟಿ
• ವಿದ್ಯಾರ್ಥಿಗಳಿಗೆ ವಿಮಾನ ಹಾರಾಟದ ಲೈವ್ ಅನುಭವ
• ರಾಷ್ಟ್ರ ಸೇವೆಗೆ ಪ್ರೇರೇಪಿಸಿದ ನೈನಿ ಗುಪ್ತಾ ತಂಡ
• ಬೆಳಗಾವಿ ಕ್ಯಾಂಪಸ್ನಲ್ಲಿ ಮೊಳಗಿದ ದೇಶಪ್ರೇಮದ ನಿನಾದ
ಬೆಳಗಾವಿಯ ಮರಾಠಾ ಮಂಡಲ ಪಾಲಿಟೆಕ್ನಿಕ್ ಕಾಲೇಜಿನಲ್ಲಿ ಇಂದು ದೇಶಪ್ರೇಮದ ಅಲೆ ಎದ್ದಿತ್ತು. ಭಾರತೀಯ ವಾಯುಸೇನೆಯ ಅಧಿಕಾರಿಗಳು ಕ್ಯಾಂಪಸ್ಗೆ ಭೇಟಿ ನೀಡಿ ವಿದ್ಯಾರ್ಥಿಗಳಲ್ಲಿ ಸ್ಫೂರ್ತಿ ತುಂಬಿದರು.
ಬೆಳಗಾವಿಯ ಮರಾಠಾ ಮಂಡಲ ಪಾಲಿಟೆಕ್ನಿಕ್ ಕಾಲೇಜಿನಲ್ಲಿ ಭಾರತೀಯ ವಾಯುಸೇನೆಯ ತಂಡದಿಂದ ವಿಶೇಷ ಸಂವಾದ ಮತ್ತು ಪ್ರಾತ್ಯಕ್ಷಿಕೆ ಕಾರ್ಯಕ್ರಮ ಯಶಸ್ವಿಯಾಗಿ ಜರುಗಿತು. ಕಾರ್ಯಕ್ರಮದಲ್ಲಿ ವಾಯುಸೇನೆಯ ಫ್ಲೈಟ್ ಲೆಫ್ಟಿನೆಂಟ್ ನೈನಿ ಗುಪ್ತಾ ಮತ್ತು ತಂಡದವರು ವಾಯುಸೇನೆಯ ಇತಿಹಾಸ ಹಾಗೂ ಸೇರ್ಪಡೆ ಪ್ರಕ್ರಿಯೆಯ ಬಗ್ಗೆ ಸಮಗ್ರ ಮಾಹಿತಿ ನೀಡಿದರು. ಇದಕ್ಕೂ ಮುನ್ನ ವಾಯುಸೇನೆ ಅಧಿಕಾರಿಗಳು ಮರಾಠಾ ಮಂಡಲ ಸಮೂಹ ಸಂಸ್ಥೆಗಳ ಅಧ್ಯಕ್ಷರಾದ ಡಾ. ರಾಜಶ್ರೀ ನಾಗರಾಜು (ಹಲಗೇಕರ್) ಅವರನ್ನು ಭೇಟಿ ಮಾಡಿ, ರಾಷ್ಟ್ರ ನಿರ್ಮಾಣದಲ್ಲಿ ತಾಂತ್ರಿಕ ಶಿಕ್ಷಣ ಮತ್ತು ಶಿಸ್ತಿನ ಮಹತ್ವದ ಬಗ್ಗೆ ಚರ್ಚಿಸಿದರು. ಸಂಸ್ಥೆಯ ಪ್ರಾಚಾರ್ಯ ರವಿ ಕುಮಾರ್ ಸೂರ್ಯವಂಶಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ಉಪಪ್ರಾಚಾರ್ಯೆ ಶ್ರೀಮತಿ ಆಶಾ ತೋರ್ವಿ ಉಪಸ್ಥಿತರಿದ್ದರು.
ಈ ಭೇಟಿಯ ಪ್ರಮುಖ ಆಕರ್ಷಣೆಯೆಂದರೆ ‘ಲೈವ್ ಏರ್ಕ್ರಾಫ್ಟ್ ಫ್ಲೈಟ್ ಸಿಮ್ಯುಲೇಶನ್’. ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿ ನೈಜ ವಿಮಾನದ ಟೇಕ್-ಆಫ್ ಮತ್ತು ಲ್ಯಾಂಡಿಂಗ್ ಕಾರ್ಯಾಚರಣೆಗಳನ್ನು ಕಣ್ಣಾರೆ ಕಂಡು ರೋಮಾಂಚನಗೊಂಡರು. ವಾಯುಯಾನ ತಂತ್ರಜ್ಞಾನದ ಈ ಅದ್ಭುತ ಅನುಭವವು ಭವಿಷ್ಯದ ಇಂಜಿನಿಯರ್ಗಳಲ್ಲಿ ಮತ್ತು ರಕ್ಷಣಾ ಕ್ಷೇತ್ರದಲ್ಲಿ ಸೇವೆ ಸಲ್ಲಿಸಲು ಬಯಸುವ ಯುವಕರಲ್ಲಿ ಹೊಸ ಉತ್ಸಾಹ ತುಂಬಿತು. ಇಲೆಕ್ಟ್ರಾನಿಕ್ಸ್ ವಿಭಾಗದ ಗೌರಿ ಉಪ್ಪಿನ್ ಅವರು ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ ನಡೆಸಿಕೊಟ್ಟರು.
