ಒಂದು ಕ್ಷಣದ ಅಜಾಗರೂಕತೆ… ಒಂದು ಹೆಲ್ಮೆಟ್‌ನ ಕೊರತೆ… ಎರಡು ಮನೆಗಳಲ್ಲಿ ಅಳಲು, ಎರಡು ಕುಟುಂಬಗಳಲ್ಲಿ ಕತ್ತಲೆ. ವಿಜಯಪುರ ಹೊರವಲಯದ ಕರಾಳದೊಡ್ಡಿ ಬಳಿ ನಡೆದ ಬೈಕ್ ಅಪಘಾತ ಎರಡು ಜೀವಗಳನ್ನು ಕಸಿದುಕೊಂಡಿದೆ. ಆದರೆ ಅದೇ ದುರಂತದ ನೆರಳಿನಲ್ಲಿ ಮಾನವೀಯತೆಯ ಬೆಳಕು ಹೊಳೆಯಿತು — ಮೃತ ಬಲರಾಮ್ ಬಾಗಲಕೋಟೆ (32) ಅವರ ಅಂಗಾಂಗ ದಾನದಿಂದ.

ರಾತ್ರಿ ಮನೆಮುಖವಾಗುತ್ತಿದ್ದ ಬೈಕ್, ಬದುಕಿನ ದಾರಿ ಮಧ್ಯೆ ಸ್ಕಿಡ್ ಆಯಿತು. ಕೆಫೆ ಕೆಲಸ ಮುಗಿಸಿ ಕರಾಳದೊಡ್ಡಿಯಿಂದ ಮನೆಗೆ ಬರುತ್ತಿದ್ದ ಬಲರಾಮ್ ಮತ್ತು ಸ್ನೇಹಿತ ಸಿದ್ದು ಅಕಸ್ಮಾತ್ ನೆಲಕ್ಕುರುಳಿದರು. ತಲೆಗೆ ಭಾರೀ ಪೆಟ್ಟು. ಹಿಂಬದಿ ಸವಾರ ಸಿದ್ದು ಸ್ಥಳದಲ್ಲೇ ಕೊನೆಯುಸಿರೆಳೆದರು. ಬಲರಾಮ್ ಗಂಭೀರವಾಗಿ ಗಾಯಗೊಂಡು ಮೊದಲು ಸೊಲ್ಲಾಪುರ ಆಸ್ಪತ್ರೆಗೆ ದಾಖಲಾಗಿ, ನಂತರ ವಿಜಯಪುರದ BLDE Hospital ಗೆ ಕರೆದೊಯ್ಯಲಾಯಿತು.
ವೈದ್ಯರ ಹೋರಾಟಕ್ಕೂ ಮೀರಿದ ಗಾಯ… “ಮೆದುಳು ನಿಷ್ಕ್ರಿಯ” ಎಂದು ವೈದ್ಯರು ಘೋಷಿಸಿದ ಕ್ಷಣದಿಂದ ಕುಟುಂಬದ ಹೃದಯ ಒಡೆದಿತ್ತು. ಬದುಕು ಕೈತಪ್ಪಿದರೂ, ಮಾನವೀಯತೆ ಕೈಬಿಡಲಿಲ್ಲ. ಸರ್ಕಾರಿ ನಿಯಮದ ಪ್ರಕಾರ ಬಲರಾಮ್ ಅವರ ದೇಹದ ಅಂಗಾಂಗ ದಾನಕ್ಕೆ ಕುಟುಂಬಸ್ಥರು ಒಪ್ಪಿಗೆ ನೀಡಿದರು. “ನಮ್ಮ ಮಗ ಹೋಗಿದ್ದಾನೆ… ಆದರೆ ಅವನ ಹೃದಯದ ತುಳುಕು, ಅವನ ಕಣ್ಣುಗಳ ಬೆಳಕು ಇನ್ನೊಬ್ಬರ ಬದುಕಿನಲ್ಲಿ ಹೊಳೆಯಲಿ” ಎಂಬ ಮಾತುಗಳೊಂದಿಗೆ ಕಣ್ಣೀರಿನಲ್ಲೇ ಮಹತ್ವದ ನಿರ್ಧಾರ ಕೈಗೊಂಡರು.

ತಡರಾತ್ರಿ ಆಂಬುಲೆನ್ಸ್ ಸೈರನ್ ಕತ್ತಲೆಯನ್ನು ಚೀರಿದಂತೆ, ಕುಟುಂಬಸ್ಥರ ಆಕ್ರಂದನ ಗಗನಮುಟ್ಟಿತು. ದೇಹವನ್ನು ಅಗತ್ಯವಿದ್ದವರಿಗೆ ರವಾನಿಸಲಾಯಿತು. “ಅಂಗಾಂಗ ಅಗತ್ಯವಿದ್ದವರಲ್ಲಿ ಬಲರಾಮನನ್ನು ನಾವು ಕಾಣುತ್ತೇವೆ” ಎಂಬ ಸಂಬಂಧಿಗಳ ಮಾತು, ದುಃಖದ ನಡುವೆ ಧೈರ್ಯದ ಕಿರಣವಾಗಿ ಮೆರೆದಿತು.
ಇನ್ನು ಮದುವೆಯ ಕನಸು ಕಾಣುತ್ತಿದ್ದ ಬಲರಾಮ್… ಬದುಕಿನ ಹೊಸ ಅಧ್ಯಾಯ ಆರಂಭಿಸುವ ಹೊತ್ತಲ್ಲೇ ವಿಧಿಯ ತೀರ್ಪು ಬಂತು. ಸ್ನೇಹಿತರು ಕಣ್ಣೀರಿಡುತ್ತಾ, “ಹೆಲ್ಮೆಟ್ ಹಾಕಿಕೊಂಡಿದ್ದರೆ ಇಬ್ಬರೂ ಬದುಕುತ್ತಿದ್ದರು” ಎಂದು ಬೇಸರ ವ್ಯಕ್ತಪಡಿಸಿದರು.
ಈ ದುರಂತ ಒಂದು ಕಠಿಣ ಪಾಠ ನೀಡುತ್ತದೆ — ಹೆಲ್ಮೆಟ್ ಒಂದು ಕಾನೂನು ಮಾತ್ರವಲ್ಲ, ಜೀವದ ಕವಚ. ಒಂದು ಕ್ಷಣದ ನಿರ್ಲಕ್ಷ್ಯ, ಎರಡು ಜೀವಗಳ ಬೆಲೆ. ಆದರೆ ಸಾವಿನಲ್ಲೂ ಸಾರ್ಥಕತೆ ಮೆರೆದ ಬಲರಾಮ್, ಇನ್ನು ಅನೇಕ ಜೀವಗಳಲ್ಲಿ ನಾಡಿಯಂತೆ ಮಿಡಿಯಲಿದ್ದಾರೆ‌.