ಅಮರಶಿಲ್ಪಿ ಜಕಣಾಚಾರಿಯಿಂದ ನಿರ್ಮಿಸಿಲ್ಪಟ್ಟಿದೆ ಎಂಬ ಐತಿಹಾಸಿಕ ದೇವಾಲಯ ಬೆಳಗಾವಿ ಜಿಲ್ಲೆಯಲ್ಲಿದ್ದು, ಮಳೆಗಾಲದಲ್ಲಿ ಅದರ ಸೌಂದರ್ಯ ಇಂದಿಗೂ ಹೊಸ ರೂಪ ಪಡೆದುಕೊಳ್ಳುತ್ತದೆ. ಪ್ರವಾಸಿಗರನ್ನು ಕೈಬೀಸಿ ಕರೆಯುವ ತಿರುಲ್ಗನ್ನಡ ನಾಡಿನ ಕಲ್ಗುಡಿ ಇತಿಹಾಸವನ್ನು ಬನ್ನಿ ತಿಳಿದುಕೊಳ್ಳೋಣ.

ವಕ್ಕುಂದ್ ಕರ್ನಾಟಕದ ಐತಿಹಾಸಿಕ ಗ್ರಾಮಗಳಲ್ಲಿ ಒಂದಾಗಿದೆ ಮತ್ತು ಇದನ್ನು “ತಿರುಲ್ಗನ್ನಡ ನಾಡು ವಕ್ಕುಂದ್” ಎಂದು ಕರೆಯುತ್ತಾರೆ. ಈ ಗ್ರಾಮದಲ್ಲಿ ಮಲಪ್ರಭಾ ನದಿ ಹರಿದು ಹೋಗಿದೆ. ವಕ್ಕುಂದ್‌ನಲ್ಲಿರುವ ಒಂದು ಐತಿಹಾಸಿಕ ದೇವಾಲಯವೆಂದರೆ ಅದರ ಹೆಸರು “ಕಲ್ಗುಡಿ” ಮತ್ತು ಇದನ್ನು ಅಮರಶಿಲ್ಪಿ ಜಕಣಾಚಾರಿ ನಿರ್ಮಿಸಿದ್ದಾರೆ. 18 ನೇ ಶತಮಾನದಲ್ಲಿ ಒಬ್ಬ ಮಹಾನ್ ಸಂತ ಮಡಿವಾಳಜ್ಜ ಈ ಗ್ರಾಮದಲ್ಲಿ ವಾಸವಾಗಿದ್ದರು. ಈಗ ವಕ್ಕುಂದ ಗ್ರಾಮವು ಕರ್ನಾಟಕ ರಾಜ್ಯದ ಬೆಳಗಾವಿ ಜಿಲ್ಲೆಯ ಬೈಲಹೊಂಗಲ ತಾಲ್ಲೂಕಿನಲ್ಲಿದೆ.

ಮಲಪ್ರಭಾ ನದಿ ಮತ್ತು ನವಿಲು-ತೀರ್ಥ ಅಣೆಕಟ್ಟಿನಿಂದ ರೂಪುಗೊಂಡ ಜಲಾಶಯ ರೇಣುಕಾ ಸಾಗರದ ಹಿನ್ನೀರಿನಲ್ಲಿ ದೇವಾಲಯದ ಸ್ಥಳ ಇರುವುದರಿಂದ, ಪ್ರತಿ ವರ್ಷ ದ್ವೀಪದ ಸ್ವರೂಪ ಪಡೆದುಕೊಳ್ಳುತ್ತದೆ. ಈ ತಾಣವು ಭಾರತದ ಪುರಾತತ್ವ ಸರ್ವೇಕ್ಷಣಾ ಇಲಾಖೆಯ ವೆಬ್‌ಸೈಟ್‌ನಲ್ಲಿ ಧಾರವಾಡ ವೃತ್ತ ವಿಭಾಗದಲ್ಲಿ ಪಟ್ಟಿಮಾಡಲಾಗಿದೆ, ಅಲ್ಲಿಯೇ ಇದನ್ನು ಮುಕ್ತೇಶ್ವರ ದೇವಾಲಯ ಎಂದು ಕರೆಯಲಾಗಿದೆ. ವಕ್ಕುಂದದ ಜನರು ಇದನ್ನು ಸರಳವಾಗಿ ಕಲ್ಗುಡಿ ಎಂದು ಕರೆಯುತ್ತಾರೆ, ಅಂದರೆ ಕಲ್ಲಿನ ದೇವಾಲಯ.

ವಾಸ್ತವವಾಗಿ, ಬೈಲ್‌ಹೊಂಗಲದಲ್ಲಿರುವ ರಾಮಲಿಂಗೇಶ್ವರ ಗುಡಿಯನ್ನು ಸಹ ಕಲ್ಗುಡಿ ಎಂದು ಕರೆಯಲಾಗುತ್ತದೆ. ಈ ದೇವಾಲಯದ ಬಳಿ ಹೋಗಿ ಮಲಪ್ರಭಾ ನದಿಯನ್ನು ನೋಡಿದಾಗಸುತ್ತಮುತ್ತಲಿನ ಸ್ಥಳಗಳು ಮತ್ತು ಮಲ್ಲಪ್ರಭಾ ನದಿ ಅದ್ಭುತವಾದ ದೃಶ್ಯಾವಳಿಗಳನ್ನು ಕಣ್ತುಂಬಿಕೊಳ್ಳಬಹುದು. ಮಳೆಗಾಲದಲ್ಲಿ ದೇವಾಲಯಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆ ನೀರಿನಲ್ಲಿ ಮುಳುಗಿ ಹೋಗಿರುತ್ತದೆ.

ಇತಿಹಾಸ ಪ್ರಸಿದ್ಧವಾದ ತಿರುಲ್ಗನ್ನಡ ನಾಡಿನ ಕಲ್ಗುಡಿಯೂ ಪ್ರವಾಸಿಗರನ್ನು ಕೈಬೀಸಿ ಕರೆಯುತ್ತದೆ. ವರ್ಷವಿಡಿ ಇಲ್ಲಿಗೆ ಭೇಟಿ ನೀಡಲು ತೂಗು ಸೇತುವೆಯನ್ನು ನಿರ್ಮಿಸಬೇಕೆಂಬುದು ಜನರ ಬೇಡಿಕೆಯಾಗಿದೆ.